Loluwari Média (Baucau) – Fundadór Fundasaun Ran Amigu Karidade (FURAK) Januário Soares ho naran koñesidu “Rio” ne’ebé pinta hafurak liutan família António Mira Belo ho nia oan feto Felisberta Pereira Belo.
Família kiik ne’e hela iha Aldeia Uai-Tunau, Suku Uma Ana Ico, Postu Administrativu Venilale, Munisipiu Baukau, ne’ebé durante tinan barak moris terus.
“Iha 2024 ita komesa hari uma, to’o agora totál uma ne’ebé ami harii hamutuk 31, ne’ebé eziste iha teritoriu nasionál”dehan “Rio” ba jornalista sira, hafoin entrega uma ba idozu António Mira Belo ho Oan feto Felisberta Pereira, iha aldeia Uai-Tunau, sabadu (09/05).
Uma simples ne’e Rio Soares diretamente entrega kedan xave ba Idozu António Mira Belo ho oan feto Felisberta Pereira Belo atu sira bele hamahan aan netik.
Tinan ne’e,Rio hatete,ekipa FURAK kontinua lao ba munisipiu hotu-hotu hodi identifika família kbiit-laek sira ne’ebé presiza hetan uma simples atu FURAK bele konstrui.
“FURAK, ami iha mehi hakarak kompleta uma hamutuk 1.000, ba familia ne’ebe vulnerável no ema ho Difiseinte iha Timor-Leste”dehan nia.
Maske uma hirak ne’ebe nia oferese simples, maibé bele kobre ba ema hotu iha teritoriu nasionál.
“Ami la ajuda ema hotu, maibé ajuda ne’e ba ema ne’ebé vulnerável liu no ema ho Difiseinte sira. Entaun Ita koko atu hafanun ema hotu-hotu Katak tulun malu hanesan timoroan ne’e importante”dehan nia.
Fundadór FURAK pinta mai ho nia moto ida katak “Riku hela ho imi Ki’ak fó mai ha’u” hodi serví de’it sira be kbiit laek ne’ebé presiza atu hetan tulun.
Iha fatin hanesan Oan feto husi idozu António Mira Belo, Felisberta Pereira Belo, ho kontente agradese ba Januario Soares ho nia ekipa FURAK ne’ebé apoiu ona sira hodi hetan mahon ne’ebe di’ak.
“Ha’u agradese barak ba Maun Januario ho nia ekipa ami rua labele selu, maibe loron ida Maromak sei selu maun sira nia kolen”hateten nia.
Xefe Aldeia Uai-Tunau, Fonciano Domingos da Conceição Belo, apresia ho inisiativa husi ekipa furak, ne’ebé ho laran luak ajuda ona nia komunidade ne’ebé vulnerável durante tinan naruk terus.
“Ha’u louva tanba sei iha timoroan ne’ebé laran luak ajuda familia vulnerável ne’ebe presiza. Ami la iha buat mean murak ne’ebé atu oferese ba maun Januario Soares ho nia ekipa”dehan nia.
Entretantu uma ne’ebe ekipa FURAK konstrui uma ho media 4X6, ne’ebé ho durasaun loron 3 ho kuartu rua inklui ho baranda ida ho nia fasilidade kompleta.
Uma ne’e rasik kompleta ho fasilidade sira hanesan, kulsaun rua, sumasu, manta, roupa, armariu, bikan, kanuru, kaneka, sana, tasu, rak pirin, inklui nesesidade bazika hanesan fos, mina tein no seluk tan.
Jornalista : Cesar Pires
Editór : Herminio Cardoso