Loluwari Média (Díli) – Polísia Nasionál Timor-Leste (PNTL), Liu-husi Komandu Munisípiu Díli sulan ona suspeitu sira hamutuk na’in 12 ba kazu asaun brutál iha Hera Akanunu foin lalais ne’e.
Komandante Munisípiu Díli (KMD), Komisariu Assistente Polísia, Orlando Gomes hatete, kona-ba kazu ne’ebé akontese iha Hera Akanunu iha loron 09 fulan Maio tinan ne’e Polísia halo ona atuasaun ba akontesimentu refere.
“Ami halo ona kapturasaun ba suspeitu 12 ne’ebé mak agora dadaun ita detein ba 72 oras no ita nia prosesu kontinua nafatin no ami sei indentifika suspeitu balun tan iha tempu badak.” Dehan Komandante Munisípiu Díli (KMD), Komisariu Assistente Polísia Orlando Gomes ba Jornalista sira iha Eskola 4 de Setembru Kaikoli Díli, Segunda (11/05).
Nia dehan,PNTL liu-husi Komandu Munisípiu Díli sei halo operasaun ba suspeitu sira atu nune’e bele halo kapturasaun ba suspeitu sira hotu ne’ebé halo asaun iha Akanunu Hera.
“Ita nia jovens sira ne’ebé halo asaun brutál iha festa halo komunidade paniku ne’e ami sei la tolera no ami sei halo operasaun boot ba sira para ami kaer hotu suspeitu sira ne’e”dehan nia.
Nia dehan,Agora dadaun prosesu lao nafatin no Motivu husi kazu ne’e jovens sira provoka malu iha festa laran maibé Investigasaun sei lao hela.
Tanba Komandu mós orienta ona Komandante Eskuadra Kristu Rei atu bele bolu konsellu Polisiamentu Komunitariu (KPK) no Ofisiál Polísia Sucu (OPS) inklui Autoridade lokál Xefe Suku no Xefe Aldeia no mós Autoridade Postu Administrativu atu bele haree situasaun ne’e.
“Iha momentu akontesimentu ne’e ita nia komunidade balun hetan kanek ne’ebé ita lori ona ba Hospital hodi halo tratamentu saúde Vitima balun mai hato’o ona keixa”dehan nia.
Enkuantu Suspeitu sira bainhira kumpri sela detensaun sei entrega ba Ministériu públiku hodi halao primeiru Interogatóriu kazu ne’e ho numeru Uniku 0146/26 DIVCR.
Suspeitu sira ne’ebé halo asaun brutál ne’e PNTL asegura ona ho inisiál AS, DS, SX, ADCS, MM, NNDDR, JB, MS, NMS, ADS,SDSP, no AM legadu ho Naran Luis Febriani Newes no Afonsu Da Silva no Festa nain Manuel Dos Santos da Conceição.
Jornalista : Cesar Pires
Editór : Herminio Cardoso