Loluwari Média (Díli) – Governu Timor-Leste no Austrália konkorda asina bilaterál foun ida iha área defeza, hodi hametin liutan relasaun amizade no kooperasaun estratéjika entre rai rua.
Asuntu ne’e sai diskusaun prinsipál iha sorumutu entre Ministru Defeza (MD), Kontra Almirante Donaciano do Rosário Costa Gomes “Pedro Klamar Fuik”, ho Ministru Defeza Austrália, Richard Marles, ne’ebé hala’o iha Edifísiu Ministériu Defeza, Fatuhada, Dili.
Ministru Defeza (MD), Kontra Almirante Donanciano do Rosário Costa Gomes “Pedro Klamar Fuik”, esklarese vizita ne’e ho objetivu atu hamutuk ho povu TL hodi komemora Loron Restaurasaun Independénsia Timor-Leste ba dala 24, maibé mós aproveita hodi diskute parseria militár entre nasaun rua.
“Ita-boot sira hatene katak Austrália ho Timor-Leste iha relasaun amizade ida ne’ebé forte tebes iha kooperasaun área bar-barak, inklui mós iha área defeza, Iha momentu ne’e, ami diskute formas oinsá mak bele hametin di’ak liután ita-nia relasaun,” dehan Ministru Defeza (MD), Kontra Almirante Donanciano Costa Gomes “Pedru Klamar Fuik ” ba jornalista sira iha Kuartel General Fatuhada Díli, kuarta (20/05).
Governante ne’e, subliña parte rua konkorda ona atu asina akordu bilaterál foun ida, ne’ebé iha futuru sei dezenvolve liután ba formatu sira seluk ne’ebé bele hakbesik nasaun rua hodi defende interese koletivu.
Iha fatin hanesan, Ministru Defeza Austrália, Richard Marles, espreme nia laran-solok no sente onradu tanba bele mai vizita Timor-Leste iha loron signifikativu ne’e, hodi hasoru malu ho nia kolega ministru Timor-oan.
“Ami nasaun rua iha domin ne’ebé boot ba malu no hanesan viziñu, ita fahe interese ba malu hanesan parseiru. Ami hala’o diskusaun ne’ebé pozitivu tebes kona-ba akordu defeza nian, hodi la haluha mós servisu sira ne’ebé hala’o ona antes ne’e,” dehan Richard Marles.
Nia hatutan, pasu ne’e signifikativu tebes no nia parte otimista katak iha mandatu Ministru Klamar Fuik nian, asinatura akordu ne’e bele realiza duni hodi foti kooperasaun defeza ba nívél ne’ebé aas liután.
Iha vizita ne’e, Ministru Richard Marles akompaña mós husi Luke Gosling, ne’ebé serbi nu’udar Nomeadu Espesiál Austrália nian ba área Defeza, liuliu ba Illas Salamaun.
Richard Marles konta katak Gosling iha relasaun ne’ebé kle’an ho TL, tanba iha tinan 20 liuba, nia mós hamutuk ona ho povu TL hodi selebra loron independénsia iha sidade Dili.
Jornalista Estajiariu : Quintão dos Santos Tilman
Editór : Herminio Cardoso