Loluwari Média (Díli) – Estudante Universitáriu Timor-Leste (EUTL) kontinua firme hodi ezize ba estatu atu ignora benefisiáriu sira ne’ebé deve hela osan banku tanba lei pensaun menál vitalisia la eziste ba eis titulares sira,tanba responsabilidade ba kontratu empréstimu ne’e ema natureza individuál.
Porta-voz EUTL, Natalizio Nunes Martins, hatete, osan estadu nian laos atu selu fali benefisiariu sira ne’ebé durante ne’e goja hela osan pensaun nian desde tinan naruk.
“Ami husu ba Parlamentu Nasionál no Governu atu la uza osan Estadu nian hodi selu benefisiáriu sira husi Lei Pensaun Mensál Vitalísia nia kréditu iha banku,Osan Estadu nian mak osan povu nian ne’ebé tenke uza ba interese públiku, la’ós atu selu ema ida-idak nia dívida pesoál,” dehan Porta-voz EUTL, Natalizio Nunes Martins, ba jornalista sira iha Kampus Sentral UNTL, Díli, terça-feira (09/06).
Nia dehan, tanba informasaun ne’ebé EUTL asesu, balun husi benefisiáriu sira ne’ebé halo kréditu iha banku prepara hela proposta konjunta ida atu husu Parlamentu Nasionál no Governu uza osan Estadu nian hodi selu sira nia dívida bankária.
Nia haktuir, katak kontratu empréstimu ne’e natureza individuál, nune’e responsabilidade ba pagamentu tenke fila ba ema ne’ebé halo kontratu ho instituisaun financeira sira. Tanba EUTL konsidera katak laiha baze legál no morál atu estadu asume kargu refere.
“Osan Estadu nian mak osan povu nian no tenke uza ba interese komun,laiha dalan ida atu Governu ka Parlamentu Nasionál uza osan públiku hodi selu benefisiáriu sira nia kréditu individuál iha banku,” dehan nia.
Tanba ne’e husu ba Prezidente Repúblika atu labele promulga diploma ka lei ruma ne’ebé bele fó dalan ba Estadu atu asume responsabilidade hodi selu benefisiáriu sira nia kréditu bankária.
“Ami husu ba Prezidente Repúblika atu, karik diploma ka lei hanesan ne’e tama iha nia gaveta, bele husu fiskalizasaun preventiva ba Tribunál Rekursu antes promulga” dehan nia.
Iha fatin hanesan membru EUTL, Caetano da Cruz, lamenta tentativu husi benefisiáriu balun husi Lei Pensaun Mensál Vitalísia nian atu husu Estadu asume responsabilidade ba sira nia kréditu bankária.
Nia dehan, Lei pensaun durante kuaze tinan 19 fó benefísiu ba grupu ki’ik ida de’it, liu-liu eis deputadu no eis titular órgaun soberania sira. Maibé depois Parlamentu Nasionál revoga totalmente lei refere no Tribunál Rekursu konfirma legalidade revogasaun ne’e, benefisiáriu balun ne’ebé halo kontratu empréstimu ho banku sira hasoru problema atu kumpri sira nia obrigasaun financeira.
“Kontratu ne’e natureza individuál no responsabilidade individuál. Tanba ne’e la iha razaun atu Estadu uza Orsamentu Jerál Estadu hodi selu fila fali dívida ne’ebé mosu husi kontratu pessoal sira,” dehan Caetano da Cruz.
Nia dehan, katak Orsamentu Jerál Estadu tenke orienta ba programa no setór sira ne’ebé fó benefísiu ba povu tomak, hanesan saúde, edukasaun no dezenvolvimentu ekonomia nasionál.
Jornalista Estajiária : Arcângela dos Santos Pereira
Editór : Herminio Cardoso