Loluwari Média (Díli) – Prezidente Interinu Federasaun Futeból Timor-Leste (FFTL), Domingos Raul “Falur Rate Laek”, hatete, rejultadu kongresu nu’udar esforsu husi estrutura no membru Asosiasaun Futeból no klubu sira inklui personalidade nasionál no internasionál sira nia kontribuisaun hotu ba eventu ohin vida ba Futeból iha Timor-Leste.
“Atu diskute dezafiu sira ne’ebé ita hasoru durante ne’e ho nune’e durante ha’u nia mandatu tinan ida ho balu presiza iha dinamika balu ne’ebé foka liu ba governasaun nian atu implementa valor no demokrasia inkluzivu transparensia hodi foti desizaun no responsabilidade, tanba ita hotu hadomi desportu, no pratika fahe paisaun nu’udar domin ba desportu.” Dehan Prezidente Interinu FFTL, Domingos Raul “Falur Rate Laek”, ba jornalista sira, iha Novu Turizmu dili, Sabadu (11/01).
Falur hatete, investimentu iha desportu hodi kontribui ba sidadaun exemplar sira, hodi kria sosiedade ida ne’ebé saudavel solidaria ne’ebé ema hotu hakarak.
“Kongresu Eletivu hanesan selebrasaun Futeból nian, ha’u iha serteza katak rekomendasaun no rejolusaun oioin husi enkontru sira ne’ebé mak assembleia konsidera sei ajuda no prepara liu tan Futeból tuir mai.”
Foinsa’e, liliu joven sira bainhira sira joga futeból sira aprende disiplina atu moris diak ho ema seluk no hari’i auto konfiansa ho ema seluk.
“Iha Kongresu ida ne’e ita hotu iha esperiénsia ba dinamika hodi hili lideransa foun hodi lidera FFTL bazeia ba meritu desportivu tanba Futeból mak ativu publiku ikus nune’e ita labele privatiza, tanba la pertense ba ema ida maibé pertense ba ema hotu tanba ne’e ita iha dever atu asegura interese Futeból nian prevalese liu interese privadu.”
Kandidatu Prezidente FFTL, Nilton Gusmão, hatete, nia prezensa tanba paisaun ba Futeból hodi kandidata nia an atu bele lidera FFTL.
“Loos duni kongresu ida ohin atu hili lideransa ida atu priense mandatu tinan ida mezmu ke mandatu tinan ida maibe ha’u sei investe no ha’u nia rekursu ne’ebé iha atu bele kontribui ita nia Futeból iha ita nia rai laran.”
Nia dehan, programa ne’ebé nia prepara no ideia no misaun prinsipál atu lidera Futeból Timor-Leste tenke hamoris fila-fali liga Futeból Timor-Leste tanba liga Futeból Timor-Leste presiza iha dinamizmu foun ida no presiza organizasaun ida ne’ebé forti no atividade regular iha rai laran.
“Ha’u triste uitoan tanba liga Futeból Timor-Leste mate tiha durante tinan 3. Maibé buat sira ne’e hotu akontese tanba situasaun barak maibé la’os sala ema ida nian, maibé iha tinan ida ne’e ha’u hamutuk ho Asosiasaun Futeból munisípais no profisionais ne’ebé ohin iha Kongresu ida ne’e se imi fo imi nia fiar mai ha’u iha tinan ida ne’e ita sei la halo buat barak maibé ita sei halo buat ruma ne’ebé ho extra-ordinaria.”
Nia dehan, se kongresista sira tau fiar ba programa ida ne’ebé nia lori nia sei servisu hamutuk ho Asosiasaun sira atu bele realiza mehi ne’ebé iha programa ne’e tanba Futeból Timor-Leste hetan dezafiu barak maibé apoiu husi FIFA, AFC no AFF inklui governu TL sei hakat liu difikuldade sira ne’ebé FFTL infrenta.
Kandidatu Federasaun Futeból Timor-Leste (FFTL), Estanislau António Baptista, deklara rejigna an ba FFTL no husu Nilton Gusmão atu realiza programa prinsipál ne’ebé nia lori.
“Bainhira ita hadomi Futeból ita aplika programa sira ne’ebé mak iha, ami hotu ohin sai sasin hodi transforma Futeból Timor-Leste ba futuru ho diak.”
Partisipa iha kongresu eleisaun ne’e Asosiasaun hamutuk 21 kompostu husi assosiasaun Futeból Aileu, Ainaro, Baucau, Bobonaro, Covalima, Dili Leste, Dili Oeste, Ermera, Lautém, Liquiça, Manatuto, Manufahi, RAEOA, Viqueque, Asosiasaun Futeból Treinadóres (AFT), Asosiasaun Futeból Arbitragen (AFA), Asosiasaun Futeból Femenina (AFF), Asosiasaun Futeból Salaun Juvenil (AFSJ), representante Primeira Divizaun Liga Timor-Leste, Karketu Dili FC Segunda Divizaun Liga Futeból Timor-Leste DIT FC ne’ebé fo sira nia votus 21 ba Nilton Gusmão hodi eleitu sai Prezidente FFTL periodu 2022-2026.
Jornalista : Chay Risky