Loluwari Média (Díli) – Diretór Fundasaun Mahein (FM), Nelson Carvalho, hatete, liña Fronteira nu’udar asuntu ne’ebé bo’ot tanba sistema integradu ne’ebé mak la’os husi Ministeriu Interiór de’it maibé husi Ministériu sira seluk mos destaka iha fronteira, tanba Timor-Leste nia fronteira luan tebes.
“Ita nia problema iha fronteira komplexu, tu’ir Fundasaun Mahein nia monitorizasaun ba problema ne’ebé akontese iha fronteira ne’e problema criminal, problema konvensional ho kilat.” Dehan Diretór FM, Nelson Carvalho, ba jornalista sira, iha nia kna’ar Dili, kuarta (15/01).
Nelson husu PNTL atu halo Investigasaun klean ba krime sira ne’e tanba bele fo ameasa ba indisiu seguransa nasionál.
“Fronteira entre Timor-Leste ho Indonésia luan tebes nune’e mos ita nia postu Unidade Patrullamentu Fronteira (UPF) ne’ebé destaka iha fronteira mos distánsia do’ok malu inklui ita nia membru UPF ne’ebé destaka mos menus nomos ita nia ekipamentus modernu mos menus tanba ita la kobre hotu entaun sai hanesan lakunas bo’ot nune’e krime organizadu sira fasil tama no sai.”
Nia subliña atu halo prevensaun iha fronteira UPF no TNI tenke patrulla ho kordenada tanba krime organizadu matenek liu sempre hakur bebeik husi fronteira rua ne’e.
“Bala musan ne’ebé ita nia sidadaun lori tama mai iha ita nia rai presiza investigasaun klean husi Instituisaun relevante atu ita bele hatene bala musan ne’e nia foti husi ne’ebé lori tama atu halo saida presiza investigasaun mak ita foin hatene.”
Nelson husu PNTL atu rekolla informasaun no halo investigasaun klean indisiu husi krime ne’e hodi submete ba Ministeriu Publiku (MP).
“Tanba sei iha mos indisiu ameasa ba seguransa nasionál, tanba ne’e rekomenda ba instutisaun Estadu atu nune’e instituisaun Estadu, bele trasa politika ida hodi haree krime sira ne’e.”
Jornalista : Chay Risky