Loluwari Média (Díli) – Komandante Munisípiu Díli (KMD), Superintendente Xefe Polísia, Orlando Gomes, hatete, Komandu Munisípiu Díli, sei servisu hamutuk ho KRAM hodi hamoos simbolu Arte marsial no arte ritual ne’ebé pinta iha parede sira iha kapital Dili.
“Ami sei servisu hamutuk ho KRAM hodi halo limpeza ba simbolu arte marsial no arte ritual ne’ebé pinta iha parede liliu iha Gang sira iha kapital Dili.” Dehan Komadante Munisípiu Díli (KMD), Superintendente Xefe Polísia, Orlando Gomes, ba jornalista sira, iha Komandu Jerál PNTL Kaikoli, Dili, kuarta (22/01).
Gomes esplika, Polisia sei servisu hamutuk komisaun regulador Arte Marsiais (KRAM) nomos autoridade lokal xefe joven sira iha kada bairu nomos KPK inklui OPS atu halo limpeza ba simbolu arte marsial no arte ritual sira.
“KMD sei servisu hamutuk ho ita nia konsellu Polisiamentu Komunitaria (KPK) nomos ho ita nia joven sira kada bairu limpeza letra ou simbolu arte marsial no arte ritual sira ne’ebé mak balu ita seidauk hamos ita esforsu atu hamos hotu.”
KMD kontinua koordena ho KPK, Ofisiál Polisia Suku (OPS) hodi halo limpeza ba kada bairu ne’ebé sei pinta ho simbolu GAM no GAR.
“Objetivu husi limpeza ne’e ita haree simbolu arte marsial no arte ritual ne’ebé pinta iha parede sira ne’e bele hamosu provokasaun nomos ita fahe fali kada bairu, bairu ida ne’e mak hamosu problema tanba orsida ema haree bairu ne’e dehan oh bairu ne’e mak husi artemarsiais no ritual ida ne’e nian tanba ne’e mak ita limpeza halo mos para kada bairu labele iha defisiensia arte marsial no arte ritual maibé ita ida de’it mesak Timor oan.”
“KRAM sei apoiu fasilidade ba KMD servisu hamutuk ho autoridade lokal nomos xefe joven kada bairu nomos KPK inklui OPS servisu hamutuk atu bele hamos simbolu arte marsial no arte ritual sira iha parede sira ne’e.
Molok ne’e ministru Interior Francisco Guterres tun direita ba bairu sira akompana husi autoridade seguransa PNTL no F-FDTL halo ona limpeza ba parede sira ne’ebe nakonu ho simbolu GAM-GAR iha kapital dili.
Jornalista : Chay Risky