Loluwari Média (Díli) – Ministeru Defeza (MD), Kontra Almirante, Donaciano Costa Gomes “Pedro Klamar Fuik”, entrega armamentu militar ba Komandu Falintil-Forsa Defeza Timor-Leste (F-FDTL) atu utiliza ba nesesidade institusional.
“Ohin ita entrega arma tipu tolu, Mini ou M249, Matralladora Lijeira atu kompleta organika iha estrutura kombate nian. Ita mos entrega M60 Matralador material semi-pezadu. M60 ne’e nia funsaun atu destroi inimigu nia posizaun kuandu sira iha defensiva ruma atu tama mai ita nia rai, Ita haruka ita nia ekipa atu sobu. Depois ita mos entrega Pistola Glock ualu (8) no munisoes.” Dehan Ministru Defeza (MD), Kontra Almirante, Donaciano Costa Gomes “Pedro Klamar Fuik”, iha Kuatel Jeneral F-FDTL Fatuhada dili, sexta (24/01).
Governante ne’e relata, tipu armamentu Militár ne’ebé MD entrega kompostu husi matralladora M249, Matralladora M60E6, no munisoes ho tipu bala Real M4, Bala Real ho pita, bala Real 7.62 x 51 MM, Bala Real ho Pita 7.62xMM, bala Pistola Real Glock 45, Bala Pistola Real Glock 23, bala Simulada 5.56×45 no bala Simulada ho Pita 5.56×45 MM.
“Ha’u husu militar sira atu kuidadu sasan sira ne’ebé governu entrega tenke utiliza ho respinsablidade.”
Armamentu militar ne’e governu halo akizisaun uza Orsamentu Jeral Estadu (OJE) ne’ebé preve ona iha lei programasaun militar. Nia afirma.
“Ita iha obrigasaun atu halo investimentu ba militar atu moderniza nune’e Instituisaun F-FDTL bele dezenvolve aan diak liu tan no sai Instituisaun militar ne’ebé servi estadu no povu ho profisional.”
Klamar Fuik husu Komandu F-FDTL liliu militar sira atu kuidadu sasan sira ne’ebé mak governu entrega ona hodi utiliza ba nesesidade Instituisaun ho responsablidade.
Xefe Estadu Maiór Jenerál Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek” agradese ba esforsu governu ne’ebé sempre tau matan ba instituisaun F-FDTL hodi dezenvolve sai Forsa modernu.
“Ha’u agradese ba esforsu Ministru Defeza nia apoia ba instituisaun F-FDTL entermus rekursu umanu no material. Ida ne’e duni mak ita bo’ot nia palavra de ondra.”
Xefe Estadu Maiór Jeneral F-FDTL mos husu ba militar sira hatudu komportamentu diak hodi tau iha pratika nuen’e kuidadu material militar ne’ebé governu oferese ba instituisaun F-FDTL.
“Ha’u alerta ba militar sira hotu atu hatudu hahalok diak, disiplina tau iha pratika atividade lorloron atu kuidadu material sira ne’e ho diak no responsavel, nune’e povu tau konfiansa ba ita.”
Jornalista : Chay Risky