Loluwari Média (Metinaro) – Komandante Centru Instrusaun, Comandante Nicolau Lobato (CICNL), Tenente Coronel, Eugenio Guterres “Tofa”, hatete, selebrasaun nia Aniversáriu CICNL ba dala 24 ne’ebé iha diferente tu’ir kondisaun, importante iha instituisaun Falintil-Forsa Defeza de Timor-Leste (FDTL).
“Tinan ida ne’e ita selebra aniversariu CICNL iha ambitu ne’ebé diferente uitoan bazea ba ita nia kondisaun, CICNL unidade ida ne’ebé importante tebes iha ita nia instituisaun F-FDTL, tanba ita hotu hatene katak CICNL mak hanesan unidade ida ne’ebé responsabilidade ba trreinamentu no formasaun militares hotu iha F-FDTL hahú husi formasaun inisial to’o iha formasaun kapitaun.” Dehan Komandante Centru Instrusaun Comandante Nicolau Lobato (CICNL), Tenente Coronel, Eugenio Guterres “Tofa” durante halo diskursu iha Metinaro, kuarta (19/02)
Tofa hatete, maske CICNL eziste tinan 24 ona maibé sei enfrenta dezafiu oin-oin, maske nune’e la hamate espíritu kamaradajen no kontinua servi ho profesionál.
“Ha’u sente onradu tebes tanba bele dezafia ha’u nia lideransa atu bele buka solusaun ida ne’ebé adekuadu hodi fo formasaun ida ne’ebé ho kualidade di’ak bazea ba forsa modernu ohin loron nian.”
Existensia CICNL tinan 24 ona maske iha fallansu no hasoru dezafiu maibé ho dedikasaun tomak no servisu profisional husi membru CICNL hodi konsege ho susesu.
“Ohin 9 Fevereiru 2025 ita halo ona 24 anos ba existensia CICNL mezmu hasoru dezafiu oi-oin maibé ho dedikasaun no profisionalizmu husi membru hotu iha CICNL, ita konsege kumpri duni tarefas ne’ebé atribui mai ita ho susesu”
Reprezentante Xefe Estadu Maior general das F-FDTL (CEMGFA), Xefe Gabinete Estadu Maior General das F-FDTL Coronel Infantaria, Marcelino Ximenes “Rizai”, hatete, selebrasaun sentru de Instrusaun Comandante Nicolau Lobato (CICNL) nu’udar sinonimu ba inovasaun no moris naruk, aniversariu CICNL ba dala 24 ne’e atu halibur militar, ofisiáis, no militar tomak.
“Selebrasaun loron sentru Instrusaun militár nian hanesan sinonimu ba inovasaun no moris naruk ho aniversariu ba dala 24 sentru ida ne’e nian sei sai razaun. Sufisiente atu halibur militar no ofisiais sira hotu formadores no komunidade militar tomak nune’e mós estrutura komandu superior husi ita nia forsa armada nian, ita sente orgullu ho historia no formasaun nivel aas ne’ebé fornese ona iha ne’e durante nia existensia.”
CICNL nia historia hakerek ona iha dékada rua nia laran ho ida ne’e hodi kontinua nafatin komprimisiu CICNL ba tinan barak no iha instituisaun militar nia laran.
“Agradse ba instituisaun no entidades oi-oin ba sira nia apoiu esensial hodi kumpri ita nia misaun onrada ho ema hotu nia apoiu ita sei afirma nafatin CICNL nu’udar laboratoriu formasaun identidade militar ne’ebé rekuñesidu ne’ebé durante ne’e fo formasaun ba militar ho karakter matenek no lideransa maibé liliu bazea ba disiplina no kodigu konduta ne’ebé forte.”
Jornalista : Maureshy