Loluwari Média (Covalima) – Xefe Departamentu Investigasaun Kriminál Nasionál (DIKN), Superintendente Polísia, João Belo dos Reis, hatete iha operasaun buska apreensaun identifika pesoal Polísia ho diviza ajente xefe inisial FDS asegura bala musan 246 ho karegador lima iha nia rezidensia.
Autoridade Seguransa, Polísia Nasionál Timor-Leste (PNTL) liuhusi Departamentu Investigasaun Kriminál Nasionál (DIKN), identifika bala musan 246 ho karegador lima iha pesoal Polísia ajente xefe inisial FDS nia rezidensia iha aldeia Asumaten suku Debos, postu administrativu Suai, munisipiu Covalima.
“Ohin ita halo operasaun ezekuta mandadu buska domisiliariu no prende sasan iha rezidensia Komisariu Konsellu Kombatentes Libertasaun Nasionál (CCLN) ho inisial FDS, maibé ita konsege identifika mós bala musan 246 ho karegador lima ita prende, tanba nia hanesan pesoal Polísia ida asegura sasán sira laiha ordem ruma husi instituisaun PNTL.” Dehan Xefe DIKN, João Belo dos Reis, ba jornálista sira iha Komandu PNTL Munisípiu Covalima, kuarta (19/02).
Belo relata, evidensia bala musan ho karegador lima ne’e, parte investigasaun sei aprezenta ba komandu jerál PNTL hodi foti medida sira tu’ir mai kona-ba utiliza armas.
“Sidadaun FDS ne’e hanesan mós membru PNTL ativu iha eskuadra Polísia Suai, maibé iha tinan 2015 lisensa sem salariu, tanba asumi hela kargu Komisariu CCLN munisípiu Covalima, depois rai hela bala musan ho karegador lima iha nia rezidensia, signifika nia halo violensia ba regras internal ami nian no liga ba lei krime, tanba ne’e buat rua ne’e sei submete hotu ba regulamentu disipliñar no krime nian sei submete ba MP.”
Tanba ne’e iha prosesu buska domisiliariu no apreensaun sasán ne’e identifika bala musan ho karegador ne’e iha ligasaun ho insituisaun PNTL nian, tanba buat hotu sei aprezenta ba komandu jerál PNTL hodi hein prosesu tu’ir mai.
“Tu’ir regra ne’ebé mak ami iha lisensa sem vensimentu to’o tinan tolu, depois halo renova, no nia renova ikus iha 2018 sa’e mai ate agora seidauk iha halo renovasaun ida ne’e hotu sei haree atu prosesu tu’ir lei Disiplinar PNTL nian.”
Evidensia sasán kona-ba rai bala musan ho karegador iha rezidensia daudaun ne’e parte investigasaun rejista ona hodi aprezenta relatóriu ba komandu jerál PNTL hodi kontinua prosesu ba Ministeriu Públiku bainhira iha ligasaun ho krime.
“Sasán evidensia sira ami relata hotu ona ba Komandu Jerál PNTL saida mak ami atu halo no evidensia ne’ebé ohin ita rekolla iha FDS nia rezidensia.”
Jornalista : Chay Risky