Loluwari Média (Díli) – Komandante Unidade Polísia Maritima (UPM), Superintendente Polísia, Eugenio Pereira, hatete, Autoridade Indonésia liuhusi Tentara Nasionál Indonésia (TNI) no Kepolisian Repúblik Indonésia (POLRI) konsege salva Sidadaun Timor ida iha Ilha Liran-Indonésia hodi entrega mai Unidade Patrullamentu Maritima (UPM) entrega hikas ba nia familia.
“Ohin ita hotu akompaña ita nia sidadaun Timor oan ne’ebé hetan insidente iha 17 Fevereiru 2025, anin udan bo’ot lori ita nia sidadaun ne’e ba iha Ilha Liran nian hafoin Autoridade Indonésia nian asegura no ohin entrega mai UPM hodi ita entrega ba nia familia.” Dehan Komandante Unidade Polísia Maritima (UPM), Superintendente Polísia Eugenio ba jornalista sira iha Postu UPM largo Lesidere dili, kinta (20/02).
Eugenio husu ba sidadaun hotu-hotu wainhira halao peka karik kuidadu ho Natureza tanba tempo agora tempo udan no anin wainhira ba halo perka karik lori ho Telemovel atu nune’e hetan insidente ruma bele kontaktu ba autoridade seguransa hodi salva sira nia vida.
“UPM nia kordenasaun ba iha Polísia Indonézia nian liu-hosi Atase POLRI ne’ebé koloka iha Kedutaan Besar Repúblik Indonézia (KBRI) iha Embaixada Indonézia wainhira simu informasaun husi vitima nia familia ami halo kedas ami nia asaun buska maibe ita nia buska ita la konsege hetan tanba kauza husi natureza anin no udan bo’ot maibé ami nafatin alarga informasaun ba autoridade Indonésia liuhusi liña koordenasaun, grasa Deus ita nia sidadaun ho naran Luis konsege enkaliadu iha Ilha Indonézia nian.”
Autoridade Indonésia lokaliza nia pozisaun UPM halo koordenasaun ho Autoridade Indonésia hodi halo prosesa tranformasaun lori nia mai iha Timor-Leste.
“Ohin ita nia Membru UPM destaka iha Atauro lidera husi Komandante Postu Akrema Ajente Abilio hodi ba kedas iha Ilha Liran hodi halo kordenasaun ho Autoridade Indonésia nian marka prezensa husi (TNI) no POLRI nomos komunidade hodi entrega ita nia sidadaun ne’e ho kondisaun ne’ebé diak no ita nia UPM konsege transporta husi Liran mai iha Postu UPM Dili.”
UPM husu ba familia atu nafatin seguransa ba sidadaun ida-idak nia an bainhira la’o peska presiza ekipamentu ne’ebé mak garantia hodi asegura sira nia vida nomos meius komunikasaun ne’e importante tebes.
“Ami nia Postu vigilansia ne’ebé iha ne’e atu aproxima ho ita nia komunidade sira atu halo prevensaun ba sira nia vida ne’e importante tebes. Bainhira halo peska tenke kuidadu mos ba ita nia natureza tanba natureza ne’e risku ba ita nia vida.”
Embaxador Indonésia ba Timor-Leste, Octo Dornius, dehan, Natureza husi anin no udan, halo Sidadaun Timor oan ida mosu iha Ilha Liran Indonésia.
“Ami agradese tanba ho esforsu Autoridade Indonésia nian ho asegura ita nia sidadaun Timor oan ne’e ho kondisaun ne’ebé diak ohin ita entrega ba UPM.”
KBRI halo kordenasaun ho Kapolda Maluku Nusa Tengara Timur (NTT) konsege hetan sidadaun Timor oan ne’e hodi entrega mai iha Autoridade seguransa UPM.
“Insidente ida ne’e mai husi ita nia natureza maibe ho ita nia esforsu sira ne’e hotu tanba ita nia relasaun ne’ebé diak durante ne’e, tanba ita nia Autoridade UPM mos perna salva ami nia sidadaun ne’ebé nia Ró nakfera maibé ho ita nia UPM ne’ebé destaka iha Atauro halo rapidamente hodi salva no la’os ida ne’e deit maibe UPM dala barak ona ajuda ami nia sidadaun Indonésia tanba ita sempre ajuda ba malu entre Timor-Leste ho Indonésia.”
Atase Kepolisian Repúblik Indonésia (POLRI), Mikel da Costa afirma, nia rona informasaun husi UPM sidadaun Timor oan ida laloran lori ba iha Ilha Liran nia direitamente telefone ba Diretór Kapolda Nusa Tengara Timur (NTT) no Diretór Intel Polda NTT Kapolres Kupang, Kapolres Belu, Kapolres Alor no Kapolres Maluku Barat Daya.
Ho maromak nia grasa Kapolres Maluku Barat dehan Sidadaun Timor oan ho naran Luis Mendes iha ne’eba duni ho kondisaun ne’ebé diak.
“Nune’e Kapolres Maluku Barat Daya informa kedas ba UPM katak ita nia sidadaun ne’ebé laloran lori nia mai iha ne’e ho kondisaun diak ne’ebé ami husu UPM atu bele mai tula ita nia sidadaun ne’e ba nia horik fatin Timor-Leste.”
“Agradese ba Maromak ohin sidadaun Timor oan ne’e bele to’o mai iha Dili ho kondisaun ne’ebé diak hodi hasoru nia familia.”
“Dala barak ita sempre hasoru situasaun hanesan mos komunidade husi Indonésia no mos Timor-Leste ita sempre ajuda malu, ita iha relasaun amizade entre POLRI no PNTL.”
Vitima Luis Mendes, haktu’ir, iha 17 Febreiru mais ou menus tuku 05 ho balu dader nu’udar peskador, ba buka ikan nu’udar atividade lor-loron.
“Bainhira ha’u dader tama tasi ha’u soe redi ikan barak ona no komesa husi ne’e anin no udan bo’ot ha’u atu fila fali mai uma maibé ha’u nia makina ró nian mate. Entaun anin lori ha’u ba area Atauro nian, maibé rai nakukun hotu tanba kauze husi udan no anin ha’u la haree rai, ha’u haree de’it mak Ilha ida ho naran Kli satu ahi lakan iha ne’eba entaun ha’u mos ba iha ne’eba.”
Bainhira nia ró ne’e para iha tasi ibun komunidade husi Indonésia hatun karau entaun vitima husu ajuda, maibé sira hanoin bosok entaun vitima tun komunidade mai ajuda dada ró no sira foti ikan ne’ebé vitima kaer.
“Ha’u tuur iha tasi ibun hodi hein sidadaun Indonésia ida mai lori ha’u ba Autoridade Seguransa POLRI hodi ha’u kontaktu ha’u nia mana ida iha munisípiu Viqueque mai hodi hasai ha’u nia foto hodi tau iha Media sosial liu tiha loron tolu foin viral no ita nia autoridade Indonésia atende ha’u ho diak iha ne’eba.” Luis Mendes haktu’ir.
“Bainhira UPM to’o iha Liran Autoridade Indonésia Autoridade lokál husi Indonésia ho komunidade mai akompaña ha’u to’o momentu ida ha’u ho UPM atu fila sira hameno hela mai ha’u katak bainhira ita ba maibé keta haluha ami.”
“Durante loron hira ha’u iha tasi laran ha’u aguenta ho paun fuan 5 no bee aqua 2 hodi han hemu to’o mosu iha Ilha Liran nian ha’u husi munisípiu Liquiça, suku Dato, ha’u nia agradesimentu klean ba Autoridade Seguransa no mos komunidade husi Indonésia tanba bele salva ha’u husi mate no bele ajuda ha’u hanesan nia familia ha’u nia obrigadu/a ba imi nia diak tomak.”
Jornalista : Chay Risky