Loluwari Media (Díli) – Diretór Diresaun Servisu Investigasaun Kriminal Nasionál (DSIKN), Superintendente Polísia, João Belo dos Reis, hatete, Komandante Jerál PNTL orienta Departamentu Investigasaun Kriminal Nasional atu nafatin formasaun ba Departamentu Investigasaun kriminál munisípiu sira atu hadia atendimentu ba Publiku.
“Ohin ita hala’o avaliasaun ba Departamentu Investigasaun kriminál husi munisípiu sira hotu atu ita bele hadia ita nia atendimentu ba Publiku liliu ba ita nia komunidade sira, tanba ne’e kada tinan DSIKN halo enkontru avaliasaun ba Xefe Seksaun munisípiu sira atu bele orienta nia membru sira servisu diak liu tan.” Dehan Diretór Diresaun Servisu Investigasaun Kriminal Nasionál (DSIKN), Superintendente Polísia, João Belo dos Reis, ba jornalista sira, iha kuartel Geral PNTL Kaikoli, Dili, Sexta (21/02).
Reis hatete, DSIKN halo avaliasaun servisu atu buka tu’ir fallansu no mos difikuldade sira ne’ebé PNTL enfrenta.
“DSIKN nafatin kapasita ita nia membru sira atu bele halo atendimentu ba ita nia komunidade ho di’ak liu tan bainhira iha fallansu ruma ne’ebé akontese iha terenu ita bele hadia hamutuk.”
Bainhira PNTL atu halo atendimentu diak tenke iha komunikasaun ne’ebé diak, atendimentu ba Investigasaun nian atu bele prosesa kazu komplexu sira ho diak.
“Ohin ita nia Investigasaun Kriminal husi munisípiu 13 inklui Regiaun Administrativa Espesial Oe-Cussi Ambeno (RAEOA), ita hakarak servisu ne’ebé ho progresu ne’ebé diak, ita tenke halo monitorizasaun no avaliasaun ba ita nia servisu.”
Bainhira akontese fallansu ba atendimentu iha terenu mak halo avaliasaun no atu hadia hamutuk iha futuru.
Jornalista : Chay Risky