Loluwari Média (Díli) – Diretor Departamentu Tranzito Seguransa Rodaviariu (DTSR), Superintendente Asistente Polísia, Luis da Costa, hatete, Polísia Nasionál Timor-Leste (PNTL) liuhusi atividade pasarevista semanal tersa ne’e Departamentu Tranzitu Seguransa Rodaviariu prende motorizada hamutuk 48 ne’ebé laiha dokumentus inklui la monta sapamatrikula.
“Ami halo cek point (pasarevista) iha fatin ho objetivu atu regulariza transporte motorizada barak iha kapital Dili. Ita hotu hatene motor barak mak lakon iha kapital Dili tanba ne’e ita konsege prende motorizada liu ba grupu sira ne’ebé naok motor iha fatin-fatin.” Dehan Diretór Departamentu Tranzitu Seguransa Rodaviariu (DTSR), Superintendente Asistente Polísia, Luis da Costa, ba jornalista sira iha Komandu Jerál PNTL Kaikoli, Dili, Tersa (04/03).
Luis hatete, Polísia Tranzitu hala’o cek point atu regulariza motorizada ne’ebé halo sirkulasaun iha kapital Dili tanba dalaruma laiha dokumentus nomos la monta sapamatrikula inklui motorista laiha karta kondusaun.
“Ita nia pasarevista ne’e atu bele kontrola mos ba ita nia sidadaun sira ne’ebé naok ema nia motor iha kapital Dili lori sai husi dili ba fali munisípiu sira tanba ne’e mak ami halo pasarevista nune’e ita prevene sidadaun sira ne’ebé hanoin atu naok ema seluk nia sasan.”
Polísia Transitu Seguransa Rodaviariu lorloron tenke halo cek point no ohin tranzitu konsege prende motorizada hamutuk 48 ho tipu ne’ebé la hanesan no infrasaun ne’ebé infratores sira komete mak laiha karta kondusaun no laiha dokumentus nomos la monta sapamatrikula.
“Ohin evidensia sira ne’ebé ami prende lori mai tranzitu atu nune’e infratores sira bele ba selu iha Banku mak hafoin sira bele mai foti fali sira nia motor.”
Jornalista : Chay Risky