Loluwari Média (Díli) – Komandante Unidade Patrullamentu Fronteira (UPF), Superintendente Polísia, Euclides Belo, informa, Servisu iha liña fronteira UPF, Alfandega no Migrasaun konsege prende Obralan (OB) hamutuk Ball 26 iha Batugede.
“Ami lansa ekipa sekreta servisu Informasaun nian, ne’ebé iha loron 04, ami prende objetu kontra bandu OB hamutuk Ball 26 ho objetu sira ne’ebé ita hetan na’in laiha ou halai ses husi fatin ne’e.” Dehan Komandante UPF, Superintendente Polísia, Euclides Belo, ba jornalista sira, iha Komandu Jerál PNTL Kaikoli, Dili, kinta (06/03).
Belo, husu sidadaun Timor oan ne’ebé tama sai iha liña fronteira atu kumpri regra ne’ebé estabelese tanba ne’e bainhira sidadaun ne’ebé mak la kumpri lei ne’ebé iha liliu sasan ne’ebé kontra bandu mak UPF hetan no halo apensaun tenke prosesa tu’ir lei.
“Objetu ne’ebé ita prende ne’e deskunfia atu transporta ou haruka ba nasaun vizinu Indonésia. Tanba ne’e mak, ita prende no sasan ne’ebé ita prende no halo prosesu no sei lori ba Komandu jerál parte justisa atu prosesa tu’ir lei.”
“Sasan kontra bandu ne’ebé UPF prende iha Mota Ain iha area Aiteka-Laran no sasan ne’e UPF tula kedas ba Komandu UPF hodi transfere ba Komandu jerál hodi prosesa ba Ministeriu Publiku (MP).” Belo subliña.
“Ita nia postu UPF agora daudaun 51 ne’e inklui kuartel Unidade kaurtek kompaña no agora daudaun ita nia membru UPF hamutuk atus tolu resin, no ami sempre halo patrullamentu koordenada ho Tentara Nasionál Indonésia (TNI) no Kepolisian Repúblik Indonésia (POLRI).
Jornalista : Chay Risky