Loluwari Média (Maubisse) – Formadora ABC Internasionál Development, Fiona Churchman, hatete, kapasitasaun ba jornalista sira foka liu seguransa ba utilizasaun media sosial iha espasu online.
“Ohin ita nia formasaun iha munisípiu Ainaro postu administrativu Maubisse, atu fo kuñesimentu ba ita nia jornalista sira iha munisípiu no postu sira atu bele prevene an iha espasu online.” Dehan Formadora ABC Internasionál Development, Fiona Churchman, ba jornalista sira iha Hotel SARA, Maubisse, kuarta (05/03).
Nia hatete, ABC Internasionál Development halo parseria ho konsellu Impresa durante tinan 2 ona hodi fo kapasitasaun ba jornalista barak no topiku diferente iha munisípiu Bobonaro, Baucau no Ainaro.
“Durante ne’e ami nia koperasaun ho Konsellu Imprensa ami halo ona formasaun barak, ami halo reportajen Investigativu, atu halo reportajen ba eleisaun no formasaun reportajen ba inkluzivu, ba futuru ami sei halo formasaun barak ba jornalista sira hodi kapasita nafatin jornalista sira iha Timor-Leste liliu saida mak jornalista Timor presiza no ami sei fo formasaun ba plataforma digital nian.”
Prezidente Konsellu Impresa (KI), Otelio Ote, dehan, formasaun ne’e atu aumenta jornalista sira nia kuñesimentu atu jere no publika informasaun iha média sosial no jornalista sira bele seguru iha espasu online.
“Ita hotu hatene ameasa husi Media sosial hahu mosu ona, ho objetivu atu limite jornalista sira atu halo kobertura tanba ne’e formasaun ohin ne’e atu jornalista sira bele ses an husi ameansa sira ne’e no oinsa jornalista hatene oinsa prevene an husi ameansa sira ne’e.”
Tempu agora jornalista feto sira sempre hetan ameasa, tanba ne’e formasaun ohin ne’e kapasita jornalista feto sira atu sira bele prevene an husi ameansa sira ne’e.
“Konsellu Imprensa nafatin buka parseria sira atu halo formasaun no kapasita jornalista sira.”
Tanba ohin partisipa iha formasaun ita nia média hamutuk 16 ne’ebé mak koloka nia jornalista sira, partisipa formasaun ida ne’e, mak RTTL.EP, GMN TV, Timor Post, Dili Post, Jornal Independent, loluwari.tl, Lafaek News, Sap News, Neon Metin, Media Mudansa, Media Labeh, Media One Timor, Radio Comunidade Liquiça, Radio Comunidade Aileu, Radio Comunidade Maubisse no Radio Comunidade Ema ho Defisiénsia.
Reprezentante Jornalista, Frozina Soares, sente orgullu bele partisipa formasaun ne’e atu jornalista sira bele seguru iha espasu online atu labele konsumu informasaun falsu (hoax) no buka informasaun ne’ebé balansu no kredivel ba rona na’in, haree na’in no leitores sira.
“Ha’u nu’udar jornalista formasaun ohin ne’e ha’u sente kontente, tanba bele kapasita ha’u no aumenta nia kuñesimentu liliu atu ita utiliza média online. Tanba iha internet iha pozitivu nomos iha negative tanba iha pozitivu mak ita bele hetan informasaun barak no lalais ba negativu mak informasaun iha média sosial dalaruma informasaun falsu ou hoax.
Jornalista : Chay Risky