Loluwari Média (Díli) – Embaixadór Canadá, Jess Dutton kuarta ne’e hasoru malu ho Prezidente Repúblika (PR), José Ramos-Horta, hodi diskute Kooperasaun bilaterál ne’ebé mak hala’o ona no kontinua atu apoia Timor-Leste nia dezenvolvimentu iha futuru.
“Ami iha audiénsia ho exelénsia Prezidente Repúblika, ami diskute kona-ba kolaborasaun potensiál oioin ho Timor-Leste, liliu apoiu ba nutrisaun ba feto no labarik ki’ik sira, fó kapasitasaun ba Feto sira iha Parlamentu Nasionál, apoiu programa ai-han liuhusi organizasaun Canadá nian iha Timor-Leste.” Dehan Embaixadór Canadá, Jessers Dutton, ba jornalista sira iha Palásiu Prezidensiál Nicolau Lobato, Bairro-Pité, Díli, kuarta (19/03).
Diplomata ne’e afirma, kontinuasaun programa nutrisaun, Kanadá nian liu-hosi nia adidu Defeza fó ona formasaun ba ofisiál militár timor oan no mós haruka ona membru Polísia Nasionál Timor- Leste (PNTL) ba tu’ir formasaun kapasitasaun iha Indonésia no Canadá kontinua fó apoiu ba Timor-Leste nia adezaun ba Organizasaun Mundiál Komérsiu (OMK) hodi dezenvolve planu negosiasaun.
“Ami orgullu atu apoia Timor-Leste nia adezaun ba OMK no dezenvolve ona planu negosiasaun ida no kontinua atu apoia Timor-Leste nia adezaun ba ASEAN, nune’e ami iha istória kolaborasaun ne’ebé naruk no hodi Governu Canadá nia naran ha’u apoia tebes hari’i Timor-Leste nia dezenvolvimentu.”
Iha diskusaun bilaterál Prezidente Repúblika, Ramos-Horta, enkoraja governu Canadá atu halo dikusaun barak liután, no identifika área potensiál lubuk ida ne’ebé Canadá sei apoiu iha futuru.
“Ha’u hatete ba Prezidente, Horta, katak Canadá mak nasaun bo’ot daruak iha mundu ho ema millaun 40, ami sei halo buat ne’ebé di’ak liu no kontinua apoia Timor-Leste nia adezaun ba ASEAN hodi loke opurtunidade barak liután ba kolaborasaun no ami iha pergunta hanesan no ezije globalmente Timor-Leste hanesan sistema multilaterál ne’ebé forte atu kontinua kooperasaun iha mundu.”
Jornalista : Chay Risky