Loluwari Média (Díli) – Amu Parokia Santo Antonio de Motael, Padre, Guilhermino da Silva, iha nia homilia hatete, hakribi ita salan fo fuan iha Maromak nia Domin atu simu Paskua.
“Maluk sarani doben sira mak nai Jesus hadomi, ita to’o ona iha domingu datoluk nian iha tempu kuaresma, mai ita hakribi ita salan hafoun ita nia fiar ba ita nia viagen ba paskua nian.” Dehan Amu Parokia Santo Antonio de Motael, Padre, Guilhermino da Silva iha nia homilia domingu da tolu nian iha Parokia Santo Antonio de Motael Dili, Domingo (23/03).
Padre Guilhermino, hatete, Maromak bolu sarani sira hotu katak Maromak nia pasensia ba ema sarani hotu atu hakribi sala no fo fuan ne’ebé diak ba ema idak-idak nia moris.
“Iha primeira leitura dehan mai ita katak kona-ba Moizes ne’ebé nia bolu liuhosi Na’i nia anju katak Na’i Maromak fo sai nia naran ba Moizes, ha’u mak ha’u, hatudu katak Na’i ne’ebé moris nia fiel no sempre akompaña nia povu. Ha’u mak o aman sira nia Maromak Abrão nia Maromak Isaac nia Maromak no Jaco nia Maromak.”
Maromak nunka husik ema ne’ebé nia bolu nia hadomi iha tempu susar nia laran no akompaña nafatin ba sira ne’ebé fo sira nia an iha sira nia moris tomak.
“Ne’e hanorin mai ita katak Maromak nunka husik, ba ema ne’ebé nia fihir ona hodi bolu sai nia atan atu terus durante ne’e no nia iha interese durante ema ne’ebé nia bolu ba kreda nia oan sira tanba Maromak bolu ka hili liuhusi kreda salvasaun nian.”
“Maromak bolu sarani sira atu sai instrumentu domin Maromak nian atu liberta ema ne’ebé moris iha susar nia laran.”
“Iha segunda leitura São Paulo mai ita sarani sira katak ita nia hamutuk fiar nian ne’e automatika fiar salvasaun nian iha Maromak nia lia bolu, tanba iha tempu kuaresma ne’e tempu diak atu refleta ita nia moris no hahu ita nia komprimisiu ba nai Maromak no la monu le’et ba gaiola pekadu ne’ebé hanesan.”
Tuir Jesus terus ne’e la sempre mosu maibé konsekuensia pekadu tanba buat ne’ebé loos ne’e mak sala ne’e sempre haterus ema.
“Na’i Jesus husu se imi la hakribi imi nia sala mak imi hotu sei mate ho maneira ne’ebé la hanesan tanba ne’e ita ema hakribi sala ne’e importante tebes ba ita nia an atu hakarak moris iha Maromak nia reinu.”
“Tanba ne’e Maromak nia pasensia mai ita sempre fo opurtunidade atu ita bele fo fuan no nia fo atensaun mai ita katak ita nia tempu mos limitadu tanba hakribi sala ne’ebé Jesus hato’o ona ne’e opurtunidade ida mai ita ema sala Na’in sira atu fila ba Maromak bainhira ita hetan opurtunidade atu fila ba Maromak liuhusi dalan hakribi salan ho faun.”
Tanba ne’e Maromak bolu sarani sira hotu atu hakribi sala no fo fuan ba ida-idak nia moris ne’e, tanba kuaresma mak tempu ne’ebé atu reflete moris ba Maromak nia pasensia. No Maromak husu ba ema hotu atu hakribi imi nia sala fo fuan ba moris ne’e liuhusi orasaun atu simu Paskua ho domin.
Jornalista : Chay Risky