Loluwari Média (Dili) – Komandante Jerál polísia nasionál Timor-Leste (PNTL), Komisariu Jerál, Henrique da Costa, hatete, iha 31 marsu komunidade muslumanu iha mundu tomak selebra sira nia loron Idul Fitri. Tanba ne’e 3 abril komisariu jeral halo vizita especial ida atu kumprimenta maske okupadu servisu.
“Ita hatene katak iha loron hirak ba kotuk ita nia komunidade muslumanu iha mundu tomak selebra loron Idul Fitri, mezmu iha tempu ne’ebá ami la mai tanba preokupa servisu mós momentu ida ohin ne’e atu mai kumprimenta komunidade sira iha ne’e la’ós ba ema hotu maibé ba estrutura iha ne’e”. dehan Komisariu Jerál PNTL, Henrique da Costa, ba jornalista sira, iha Kampung Alor Anu’ur, Kinta (03/04).
Komunidade muslumanu Selebra loron Idul Fitri iha loron 31 Marsu tinan 2025 ne’e la’ós buat foun ida maibé kada tinan mós selebra, ne’ebé iha tinan kotuk mós Komandante PNTL halo kumprimenta hanesan.
Entre tantu Komandante Geral PNTL, husu ba Prezidente no estrutura tomak nafatin halo komunikasaun ba parte seguransa sira bainhira iha asuntu seguransa nian nafatin kolabora hodi fo apoiu seguransa ba komunidade muslumanu iha Timor-Leste.
“Ami husu ba Presidente fundasaun ho estrutura sira nune’e nafatin halo komunikasaun ho parte seguransa karik iha asuntu seguransa ruma bele kontaktu ho ami nune’e bele atende”. komjer afirma.
Komisariu Jerál agradese ba eskola Anu’ur tanba partisipa iha atividade PNTL komemora aniversariu PNTL, primeiru Anu’ur halo kompetisaun ba marsa, segundu Desportu futsal no halo marsa iha loron 22 fulan Marsu tinan 2025 ba aniversariu PNTL ba dala XXV no PNTL halo vizita ba eskola sira iha Munisípiu Dili.
“Ami mós uza biban ida ne’e hato’o agradesimentu ba iha eskola Anu’ur ne’ebé maka iha loron hirak ba kotuk bele partisipa ona iha atividade sira ne’ebé mak hodi komemora ba iha loron polísia, primeiru mak sira partisipa ba iha marsa guarda kompetisaun, Anu’ur partisipa atividade Desportu futsal.
“Ami mós ohin hato’o programa komandu mak polísia vizita ba eskola polísia vizita ba Universidade. Entaun ohin ita mós ko’alia ho Prezidente fundasaun katak iha tempu badak ami nia ekipa kuñesimentu militár ninian iha fali tranzitu ninian investigasaun sei mai hasoru malu atu nune’e ita realiza programa polísia vizita ba eskola.”
Prezidente Konsellu Kuradór Fundasaun Masjid An-nur, Abdullah Said Sagran, agradese ba presenza Komandante Jerál PNTL tanba vizita ne’e hatudu PNTL iha atensaun ba komunidade muslumanu Timor-Leste.
“Ami nia agradesimentu komandante jerál PNTL, tanba mai vizita ita ne’e hatudu katak PNTL iha atensaun ba iha komunidade islamika iha Timor-Leste mezmu ida ne’e minoria ami haksolok ami simu komandante ho nia espoza”.
Konsellu Kuradór Fundasaun Masjid An-nur Abdullah Said Sagran, hatete, komunidade muslumanu hala’o jejún durante loron 30 nune’e momentu opurtunu atu hasa’e fiar halo mudansa espirituál.
Jornalista. : Anis