Loluwari Media (Dili) – Ministeriu Transporte Komunikasaun (MTK) no liuhusi Diresaun Nasional Transporte no Terrestre (DNTT) ho Polisia Nasional Timor-Leste (PNTL), Diresaun Tranzitu Seguransa Rodaviara Nasional (DTSRN), husu publiku komesa 7 Abril 2025 husi transporte privadu no publiku labele para liu minutu 5 iha Rotunda Comoro-Ponte BJ Habibie.
Diretora Diresaun Nasional Transporte Terrestres (DNTT), Maria Antonia Vitor da Costa, hatete Ministeriu Transporte Komunikasaun (MTK) liuhusi (DNTT) Servisu hamutuk ho PNTL liuhusi Diresaun Tranzitu Seguransa Rodaviaria Nasional (DTSRN), hakarak hato’o ba publiku katak hahu loron 7 Abril 2025, kareta ho motor labele para liu minutu 5 hodi labele hamosu engarafamemtu ba movimentasaun sira.
“Ministeriu Transporte no komunikasoens liuhusi DNTT Diresaun Tranzitu Seguransa Rodaviaria opurtunidade ida ne’e hakarak hato’o ba publiku tomak katak hahu 7 Abril husi rotunda Prezidente Nicolau Lobato to’o iha ponte BJ Habibie, katak labele para kareta ka motor iha estrada ninin liu minutu lima (5) hanesan ita hotu hatene katak estrada fatin ba kareta motor atu halo sirkulasaun ho livre, atu labele impede movimentasaun rodaviaria.” dehan Diretora DNTT, Maria Antónia, ba jornalista sira, iha Balide, Kinta, (03/04).
Diretora DNTT, salienta, DNTT servisu hamutuk ho Polísia Nasionál Timor-Leste (PNTL) liuhusi Diresaun tranzitu seguransa Rodaviaria nasionál (DTSRN) ne’ebé hahu dahuluk ho dalan protokolu no sei kontrolu mós ba loja sira ne’ebé nia kareta para permanente iha dalan públiku.
“DNTT servisu hamutuk ho Polísia tranzitu nasionál ita hahú uluk koordena iha dalan protokolu sira, fazeadamente ita sei hala’o mós ba dala sira seluk ne’ebé ita hotu hatene katak iha loja sira balu ne’ebé mak kareta para permanente. Entaun ida ne’e mós difikulta movimentasaun rodoviaria, ita hotu hatene lor-loron ita haree kareta sira sempre para iha estrada ninin dala ruma para to’o dalas rua dalas tolu, ida ne’e afeita mós ba movimentasaun rodaviaria.” nia informa.
Entre tantu informasaun ne’e hahu husi 3 Abríl 2025, no ba oin orientá no ordena rodaviaria sira labele para iha estrada ninin hodi difikulta movimentasaun ba rodaviaria no evita engarafamentu iha dalan públiku sira.
Diretora DNTT, Maria Antónia, husu motorista sira hotu nia kontribuisaun atu hahú ordena ba kareta no motor labele para iha dalan ninin nune’e labele hamosu engarafamentu.
“Iha opurtunidade ida ne’e hakarak husu ba hotu-hotu nia kontribuisaun atu nune’e neneik maibé beibeik ita hahú ordena kareta no motor sira atu labele para iha estrada ninin, dala ida tan ha’u avisa katak atu labele impede movimentasaun rodaviaria ami mós fo hanoin mós iha opurtunidade ida ne’e ba loja na’in sira ne’ebé mak durante ne’e ita haree hahu husi dader bainhira sira nia atividade loke loja komesa to’o loraik sira nia kareta sira sempre para permanente iha estrada ninin tanba sira laiha fatin parajen.”
Alende ne’e Diresaun nasionál transporte terrestre (DNTT) hamutuk ho diresaun tranzitu seguransa Rodaviaria nasionál (DTSRN) husu ba loja na’in sira hodi buka fatin parajen hodi para no labele para iha estrada ninin, ho ida ne’e sei hahu kontrola husi dalan protokolu nian husi Rotunda Prezidente Nicolau Lobato to’o iha Ponte BJ Habibie.
Liuhusi informasaun ne’e hodi alerta ba transporte privadu no transporte públiku sira hodi kumpri nafatin movimentasaun rodaviaria nian no bainhira la kumpri sei hetan sansaun tu’ir dekretu lei numeru 6/2003 kodigu estrada nian.
Jornalista. : Anis