Loluwari Média (Díli) – Prezidente Repúblika (PR), José Ramos-Horta, konkorda ho IX Governu Konstitusionál nia planu atu taka Institutu Públiku (IP) no Empreza Públiku (EP), barak demais.
“Ha’u konkorda atu taka IP no EP ne’ebé barak demais iha ita nia rai doben Timor-Leste. Tanba governu anteriór sira no polítiku sira mak inventa Institutu Públika, no Empreza Públika.” Dehan PR, José Ramos-Horta, ba jornalista sira, iha Palasiu Prezidensial Nicolau Lobato, Bairro-Pité, Dili, tersa (25/03).
PR hatete, Institutu Públika iha rai seluk iha, maibé bainhira bolu Institutu Públika ida, Institutu ne’e nia rasik mak hatene halo hatama osan ba estadu, la’os IP no EP mak buka osan ba fali estadu.
“Tanba hatama osan bo’ot, entaun tenke halo jestaun nu’udar empreza komersiál ida, Institutu Públika, mas empreza komersiál ida, hatama osan bo’ot, só hatama osan bo’ot entaun Direitór Institutu ne’e bele simu saláriu vensimentu extra ho bonus, tinan-tinan bonus tanba nia hatama osan bo’ot.”
Diretór Empreza Públika balu iha rai liur ne’eba, iha Portugál, ema sira ne’e manan osan tanba sira hatama billaun dollar, iha Timor nian la’e, nein duit metan ida, eletrisidade sira la hatene kaer.
“Eletrisidade EP ne’e ha’u estraga ema nia sasan, komputadór, mákina ospitál nian mós estraga. Iha Baucau ekipamentu estraga, tanba eletrisidade, se mak responsavel, sira Diretór eletrisidade nian, problema no manan osan bo’ot liu fali Prezidente Repúblika, ha’u konkorda taka.”
“Dekretu lei governu seidauk lori mai, mas ha’u ko’alia ho Primeiru Ministru (PM) dala hira ona, Primeiru Ministru rasik mós ko’alia tiha ona publikamente ba ida ne’e, entaun tenke taka, tanba demais liu ona, mak governu lori dekretu lei mai, ha’u halo kedas promulgasaun, ha’u taka matan tiha depois asina kedas, konkorda pursentu 100 (100%).”
Jornalista : Chay Risky