Loluwari Média (Covalima) – Prezidente Repúblika (PR), José Ramos-Horta, triste haree kondisaun infra-estrutura estrada ne’ebé liga husi munisípiu Covalima ba postu administrativu Tilomar suku sira tanba Timor-Leste festeza nia indepensia tinan 20 resin ona, maibé, governu seidauk tau atensaun ba infra-estrutura estrada no mos fronteira.
“Kondisaun Infra-estrutura hanesan estrada ha’u sempre ko’alia bebeik ba governu atu tau matan ba estrada sira husi munisípiu ba postu administrativu, suku no aldeia sira hotu-hotu.” Dehan Prezidente Repúblika (PR), José Ramos-Horta, ba jornalista sira, iha suku Biseuk postu Tilomar, munisípiu Covalima kinta (27/03).
Xefe Estadu, espera Ministériu relevante ne’ebé iha responsabilidade hodi haree planeamentu estratèjiku tenke fó prióridade ba infra-estrutura estrada sira.
“Ho ita nia kondisaun estrada iha Tilomar ha’u husu diskulpa ba komunidade sira iha suku Biseuk ne’ebé besik fronteira ne’ebè seidauk tau matan ba kondisaun infra-estrutura iha aldeia, suku no postu sira iha fronteira iha loron ruma primeiru Ministru bele mai vizita imi.”
Administradór postu Tilomar, Venâncio Sarmento, agradese ba xefe estadu ne’ebé vizita direita hodi haree kondisaun estrada no situasaun infra-estrutura iha postu administrativu Tilomar.
“Ita haree kondisaun estrada grave tebes durante ne’e komunidade sira halo movimentu ba mai husi postu ba kapital munisípiu aat loos no komunidade atu lori sira nia produtu lokal ba merkadu mos susar teb-tebes tanba ne’e ha’u husu ba IX governu atu tau prioridade mos ba komunidade nia sira nia preokupasaun.”
Xefe suku Beiseuk, Antonio Cardoso, hatete, kondisaun estrada ne’ebé durante ne’e grave tebes maske Timor-Leste restaura nia independénsia tinan 20 resin ona maibé governu seidauk tau matan.
“Ohin ita nia PR ho nia komitiva sira to’o mai haree direitamente, ho ita nia kondisaun estrada ne’e rasik ne’ebé durante ne’e ami preokupa tebes. Ha’u nia komunidade sira atu lori nia produtu lokal ba merkadu mos difikulta tebes ba movimentu estrada.”
Postu administrativu Tilomar iha suku 4 mak suku Lalaua, Beiseuk, Maudemo no Kasabauc ho total populasaun 11.435, no komunidade sira moris ho vida agrikultór.
“Hanesan autoridade lokal ha’u husu ba Ministeriu relevante atu hadia ami nia estrada ne’e tanba difikulta tebes ba ami nia movimentu liliu komunidade sira atu lori sira nia produtu lokal ba merkadu.”
Komunidade Zulmira Sarmento, sente triste maske Timor-Leste independénte durante tinan 20 resin maibé sira seidauk sente dezenvolvimentu infra-estrutura bazika hanesan estrada ne’ebé difikulta ba sira nia movimentu.
“Ha’u hanesan komunidade ha’u sente triste tebes ba ukun an ida ne’e maske ita ukun an tinan 20 resin ona maibé ami nia kondisaun infra-estrutura baziku lao hakdasak los no kada governu ukun truka malu maibé seidauk tau matan ba ami nia estrada ne’ebé ho kondisaun grave, ami atu lori ami nia produtu lokal ba merkadu mos susar tebes.”
Jornalista : Chay Risky