Loluwari Media (Díli) – Boxista Profisional husi Tomas Americo Boxing Promotion, Manuel Expostu de Araujo, sei partisipa eventu no sei hasoru malu ho nia adversariu boxista Atid Karun iha Tailandia Bangkok iha loron 4 Maiu 2025.
“Ohin loron ami nia boxista ho ami nia treinador iha ne’e orsida meudia sei aranka ba Tailandia hodi partisipa eventu boxe iha Bangkok Tailandia, ami hakarak esklarese katak preparasaun durante ne’e ami hala’o kona-ba tekniku boxista la’o ho diak, ida ne’e mak ami nia esperansa tanba ita ba reprezenta nasaun,” Dehan Jestor Tomas Americo Boxing Promotion, Junior Tomas Americo, ba jornalista sira iha Villa Verde, sexta (02/05).
Junior haktuir, durante ne’e buka hela sponsor maibé agradese tanba vise primeiru ministru Mariano Assanami Sabino apoiu finansa uitoan.
“Kona-ba sponsor ha’u hanoin ami la’o duni husu apoiu ba entidade balu maibé neste momentu ami bele husu agradese de’it ba señor vise primeiru ministru señor Assanami Sabino ne’ebé mak fo apoiu ami ho finansial uitoan atu bele rekopera iha Tailandia ne’eba tanba ita hatene iha Tailandia nasaun bo’ot ne’eduni ita presiza osan uitoan”.
Treinador Tomas Americo Boxing Promotion, Alexandrino Bareto, afirma, preparasaun treinu kuaze fulan 4, treinu ho maximu tanba kompete ho klase 58 kilograma.
“Hanesan treinador ba Tomas Americo Boxing Promotion ami nia preparasaun kuaze besik fulan 4 atu hasoru eventu ba perebutan gelar iha Tailandia ne’e maibé ami tama hanesan parte tambahan iha ne’eba ne’eduni ba preparasaun ne’ebé ami hala’o treinu ho maximu tebes atu bele kompete iha klase 58 kg hanesan klase super fighter whait debut pro ne’ebé mak segundu ba Manuel Expostu de Araujo ne’ebe mak hala’o iha Tailandia.
Treinador ne’e esplika, kona-ba Boxing taktika ita sempre fo treinu mak aumenta footwork ho aumenta skill tanba típikal boxer ne’ebé mak ha’u treinu ne’e hanesan típikal fighter uitoan. Entaun iha ne’eba treinu fiziku ne’e makás, kona-ba speed, power hands, daya tahan tubuh.
“Ita fiar katak ho ita nia preparasaun ne’ebé mak iha ita fiar bele kompete mos iha eventu sira ne’ebé mak ita hetan konvite rasik husi ema nia promotor sira ne’ebé mak iha, ne’e duni iha promotor sira ne’ebé mak iha ligasaun mos Tomas Americo entaun opurtunidade ema fo mos mai Tomas Americo atu bele promove ita nia atleta sira ne’ebé mak iha potensia ba futuru.
Manuel Espostu de Araujo, naran kodigu boxing Liurai, husu ba timoroan hotu liliu ba boxista sira atu apoiu orasaun hodi bele hetan rezultadu ne’ebé diak (manan iha eventu ne’e).
“Preparasaun fulan 4 kedas, ha’u sente iha 90 pursentu atu kompete iha Tailandia, ha’u fiar-an katak ita nia Timoroan sira reza fo liman hamutuk no suporta ha’u hodi lori ita nia rai doben Timor-Leste ba oin.”
Enkuantu orariu ba jogu hahu iha 4 Maiu 2025, no ekipa sei aranka iha ohin 2 Maiu ho tuku 1 oras Timor-Leste no sei to’o iha Tailandia iha tuku 9 oras Bangkok, Tailandia.
Jornalista: Nono