Loluwari Média (Díli) – Diretór Diresaun Departementu Investigasaun Kriminal Nasionál (DDIKN), Superintendente Polísia, João Belo dos Reis, hatete, iha 16 Juñu akontese kazu naok ten sira ne’ebé sobu loja iha area Fatuhada postu administrativu Dom Aleixo munisípiu Díli.
“Bainhira ami rona informasaun, ita nia ekipa konjunta kompostu husi servisu Informasaun polisia, servisu forsa armada no Servisu Nasionál Inteligensia (SNI) halo servisu rapidamenta halo treaking ba kriminozu sira ne’ebé envolve iha kazu ne’e.” Dehan Diretór Diresaun Departementu Investigasaun Kriminal Nasionál (DDIKN), Superintendente Polísia, João Belo dos Reis, ba jornalista sira, iha Komandu Jerál, PNTL Kaikoli Dili, kuarta (25/06).
Belo hatete, suspeitu na’in 7 ne’ebé Polísia kaptura hotu no halo ona identifikasaun, husi Investigasaun Kriminál Dom Aleixo nian aprezenta ba Ministeriu Públiku (MP).
“Horseik ami hetan mandadu detensaun husi Tribunál Distritu Dili (TDD), ami halo kedas operasaun imediata ba suspeitu na’in hitu (7) ne’ebé horseik ami detein, no agora daudaun iha sela detensaun Dom Aleixo.”
Nia relata, suspeitu ho inisial DDJ, YGKS, KD, SF, DP, ASG no ADV ne’ebé daudaun ne’e iha sela detensaun Eskuadra Dom Aleixo.
“Suspeitu sira ne’e ita konsidera suspeitu kroniku sira, tanba suspeitu sira tama sai sela no halo krime bebeik tanba hetan libertasaun husi Tribunal sira kontinua halo nafatin.”
“Suspeitu sira ne’e bolu “Nakro” Naokten Kroniku ne’ebé suspeitu na’in 7 iha ona PNTL nia liman no na’in 2 Polísia sei halo kroniku nafatin tanba PNTL ho nia parseiru sira sei la fo opurtunidade ba naokten sira hanesan ne’e atu eziste iha Timor-Leste.”
“Ami garante hamutuk ho komunidade no ami nia parseiru sira hodi garantia ba ita nia rai Timor-Leste, nia seguru ba ema hotu tanba kazu ne’e rasik rejista ho numeru nuk O413/2025 Eskuadra Dom Aleixo, ne’ebé ami sei aprezenta hotu bainhira se de’it mak envolve iha kazu ne’ebé sira komete no bainhira ema ruma mak haruka nia sei hatan ho perante ba lei.”
“Ha’u husu ba inan-aman ne’ebé nia oan sira kriminozu no naokten sira atu kuidadu ita bo’ot sira nia oan sira atu buka tu’ir sira iha ne’ebé bainhira imi nia oan sira derepente kaer osan barak ou sae motor derepente karik, inan-aman la hola tenke buka tuir atu hatene inan-aman labele kontente fali ho oan sira nia rejultadu krime signifika inan-aman kontribui ba oan sira nia aktu.”
Tanba ne’e PNTL husu ba inan-aman sira no komunidade hotu no autoridade lokal sira atu koopera ho PNTL atu informa bainhira identifika aktu ou krime ruma akontese iha imi nia bairru informa direita ba Autoridade Seguransa PNTL liliu Ofisiál Polísia Suku (OPS) no Eskuadra ne’ebé besik liu imi atu nune’e PNTL bele halo atuasaun iha tempu ne’eba kedas.
Jornalista : Chay Risky