Loluwari Média (Manatuto) – Ekipa Polísia Nasionál Timor-Leste (PNTL), sai kampiaun iha jogu final kopa Maun Bo’ot Kay Rala Xanana Gusmão hafoin halakon nia adversariu Lai Soru Lai, iha Estadium Emyrates Manatuto.
Inisiu jogu jogador ekipa rua lansa kedas kontra atake ne’ebé treinador sira orienta atu hetan rejultadu pozitivu iha jogu refere.
Ekipa PNTL mai ho ambisaun atu hetan vitoria iha jogu ikus atu asegura titulu kopa Avo Nana 2025, alende ne’e misaun ida atu halo moe ekipa Lai Soru Lai nu’udar kampiaun ka juara bertahan iha 2025.
Ekipa PNTL halo presaun makaas ba ekipa adversariu Lai Soru Lai, hatudu jogu ne’ebé furak hodi hetan vitoria. Jogu etapa finais ne’e rasik anima tebes adeptus sira hodi fo apoiu nia ekipa atu hetan vitoria apoiu ekipa rua ho lian makaas.
Ekipa Lai Soru Lai lansa atake ne’ebé makas no atake hirak ne’e fo kedas opurtunidade ba jogador Martinho Belo, ho numeru kamijola 23 konsege realiza golu ida iha minutu 15 primeiru parte.
Maske derota uluk husi ekipa adversariu ekipa PNTL mos la nonok de’it maibé nafatin ho pasensia PNTL fiar aan atu sai kampiaun hodi kontinua hatudu jogu ne’ebé diak liuhusi liña mediu, defeza no avansadu maske jogador barak ladauk iha esperiénsia joga iha liga, kompara ho ekipa adversariu Lai Soru Lai nia jogador barak joga iha liga.
PNTL hatudu nia influénsia ho forsa ne’ebé naton iha minutu 40 jogador Adelino Coelho ho numeru kamijola 03 konsege realiza golu ida ba nia ekipa hodi halo jogu empata 1-1.
Golu Adelino halo Lai Soru Lai nia mentalidade rungu-ranga no la konsege hatudu jogu ne’ebé diak, falta kontrolu no la ezekuta opurtunidade ho maximu. Rejultadu 1-1 ne’e mantein to’o jogu primeira parte termina..
Tama iha segunda parte ekipa rua sei tuba nafatin ho pozisaun idak-idak hodi kontinua luta, ekipa Lai Soru Lai utiliza meius oioin atu realiza golu hodi hakoi mehi PNTL atu sai kampiaun, maske nunne’e ekipa PNTL sempre kria opurtunidade atu realiza sira nia mehi atu hetan vitoria.
Ekipa, Lai Soru Lai, mos sempre tenta atu realiza golu ba adversariu maibé liña defeza ekipa adversariu PNTL sempre halo presaun iha liña oin halo avansadu Lai Soru Lai, falla iha finalidade nune’e to’o jogu segunda parte termina ekipa rua mantein rejultadu 1-1.
Nune’e ekipa arbitrajen deside ba tempu adsional 2×15 minutu. Iha tempu extra ne’e mak ekipa PNTL iha minutu 92 konsege realiza golu ida liuhusi jogador Jaimito ho numeru kamizola 28, hodi muda rejultadu ba 2-1. Rejultadu ne’e halo ekipa PNTL fiar aan atu sai kampiaun ba Kopa Maun Bo’ot Kay Rala Xanana Gusmão iha epoka 2026.
Prezidente Club ekipa Lai Soru Lai, Orlando Eduardo da Costa, hatete, nia ekipa maske foin hamri’ik tinan 2 maibe sai kampiaun iha tinan dahuluk no iha tinan tu’ir nia ekipa avansa to’o etapa finais maske iha jogu final daruak la konsege hetan vitoria maibé ekipa ne’e hetan ona konfiansa husi adeptus sira. Derota ne’ebé ekipa Lai Soru Lai, hetan sai motivasaun atu hadia iha futuru.
“Ha’u lori komunidade no ekipa nia naran, orgullu tanba husi sira nia esforsu mak ekipa Lai Soru Lai, mai to’o ohin tanba ho sira nia asaun no kontrusaun ohin ami hakat mai to’o final. Hanesan ema ne’ebé hadomi desportu tenke simu rejultadu, mak orgullu ho manan, agradese bainhira impata no fuan bo’ot, lakon tanba ne’e manan ka lakon ami simu, tanba jogu ne’e sempre iha manan no lakon. Ha’u orgullu ba ekipa PNTL tanba sira nia ekipa jogu diak sai kampiaun ba tinan ne’e.”
Treinador ekipa PNTL, Eduardo Pereira, hatete, susesu ne’ebé nia ekipa hetan iha kopa Kopa Maun Bo’ot Kay Rala Xanana Gusmão ne’e mai husi jogador sira nia disipliña iha treinu to’o ohin loron.
“Ami nia ekipa PNTL nia suporta mai husi Sua Exelénsia Komandante Jerál PNTL no estrutura PNTL nian, ohin loron ami sai susesu, tanba ne’e ami iha ona Klubu atu partisipa iha Terseira Divizaun.”
Kapitaun ekipa PNTL, Adelino Coelho, orgullu tanba iha inisiu jogu derota maibé ikus mai halo jogu ne’ebé diak hodi hetan vitoria.
“Ami ekipa PNTL hahu jogu iha Estadiu Munisipal Cafe Ermera, ami derota ho ami nia adversariu Relay Laleia, maibé ho falla hirak ne’e ami konsege hadia no esforsu tomak to’o mai ohin loron sai kampiaun ba Kopa Maun Bo’ot Kay Rala Xanana Gusmão, ida ne’e no ami sei lori tasa Rotativa ida ne’e ba Kuartél Jerál PNTL Kaikoli.”
Jornalista : Chay Risky