Loluwari Média (Díli) – Diretór Diresaun Investigasaun Kriminal Nasional (DIKN), Superintendente Polísia, João Belo dos Reis, informa, iha domuingu kalan mais ou menus tuku 9 liu minutu 30 servisu informasaun polisia imigrasaun no investigasaun kriminal halo operasaun ba hotel balu iha Dili laran area Hudi Laran hodi asegura Joven Feto menoridade na’in 6.
“Ami simu informasaun katak hotel ne’e fasilita prosikzaun Infantil ka esplorasaun seksual ba labarik menoridade feto na’in neen (6). Tanba ne’e horikalan ami asegura kedas sidadaun feto na’in ne’en no mos na’in ba Hotel refere.” Dehan Diretór Diresaun Investigasaun Kriminal Nasional (DIKN), Superintendente Polísia, João Belo dos Reis, ba jornalista sira, iha Kuartel Jerál PNTL, Kaikoli, Dili, Tersa (01/07).
Belo esplika, servisu informasaun polisia imigrasaun no investigasaun kriminal detekta sidadaun Timor feto ho minoridade na’in 6 transporta kedas ba kuartél Jerál PNTL hodi halo identifikasaun inklui na’in ba hotel no bainaka ba hotel.
“Agora daudaun ami halo hela prosesu hodi bele aprezenta ba Ministeriu Públiku (MP) orsida lokraik.”
“Servisu informasaun lansa iha fatin-fatin detekta katak iha fatin ne’eba akontese transaksaun ka prosesaun Infantil explorasaun seksual ba labarik sira. Tanba ne’e mak PNTL halo intervensaun hodi bele hapara atividade sira ne’e.”
“Sira ne’ebé mak fasilita ka rekruta labarik sira hanesan na’in ba hotel no sira ne’ebé mak servisu iha laran ita sei lori sira ba DIKN hodi halo identifikasaun no mos na’in ba hotel na’in 1 inklui sira ne’ebé mak servisu iha hotel.”
Depois halo tiha identifikasaun PNTL husik no aprezenta ba Ministeriu Públiku hodi hein prosesu tuir mai no alin feto sira ne’e halo identifikasaun hotu intrega fali ba sira nia inan-aman.
“Polisia Nasionál Tomor-Leste husu ba inan-aman sira atu kontrola oan sira, tanba grupu balu iha hanoin aat atu halo explorasaun ba labarik sira ne’ebé mak minoridade. Iha kada kazu ne’ebé polisia halo intervensaun husi Unidade seluk mos halo intervensaun sira intrega kedas mai investigasaun kriminal hodi halo prosesu legais hodi aprezenta ba Ministériu Públiku.”
Jornalista : Chay Risky