Loluwari Média (Díli) – Diretór Diresaun Investigasaun Kriminal Nasional (DIKN), Superintendente Polísia, João Belo dos Reis, informa, Iha 17 Juñu 2025 mais ou memus iha tuku 11 kalan ekipa konjutu husi Unidade Patrullamentu Fronteira (UPF) no servisu informasaun sekreta, detekta no asegura joven hamutuk 16 iha fronteira ne’ebé tenta atu hakat ba mota sorin hodi sa’e sintu OAM.
“Ita nia membru UPF no servisu Informasaun Sekreta detekta no kaptura ita nia sidadaun na’in 16 ne’ebé mai husi munisípiu Liquiça ne’ebé sira detein no prende halo impedementu ba sira, tanba ita nia sidadaun na’in 16 tenta atu hakat ba fronteira hodi tu’ir seremonia graduasaun Arte-Marsiais nian.” Dehan Diretór Diresaun Investigasaun Kriminal Nasional (DIKN), Superintendente Polísia, João Belo dos Reis, ba jornalista sira, iha Komandu Jerál PNTL Kaikoli, Dili, Tersa (01/07).
Belo esplika, iha rejolusaun IX governu Konstitusionál bandu sidadaun sira atu labele hala’o atividade Organizasaun Arte-Marsiais (OAM) nian maibé sidadaun sira kontinua komete atividade OAM, hodi hakat liu fronteira no sira la obedese ba rejolusaun governu numeru 22/2025.
“Rejolusaun numeru 42/2023 husi IX Governu Konstitusionál fo sai katak kontinua suspende pratika atividade Arte-Marsiais nian iha ita nia teritóriu Nasionál maibé na realidade ita nia sidadaun na’in 16 tenta atu hakat ba fronteira, tanba ne’e ita nia Polísia Nasionál Timor-Leste (PNTL) liuhusi UPF no servisu Informasaun sekreta detekta sira no halo kapturasaun ba membru OAM ne’ebé tenta atu hakat ba mota sorin hala’o nia atividade no la kolabora ho Autoridade seguransa no la obedese ba lei.”
“Hanesan Autoridade seguransa PNTL, servisu bazeia ba lei no orden se bainhira sidadaun sira la kumpri rejolusaun IX governu Konstitusionál nian, ami sei detein no ami aprezenta ba Ministeriu Públiku (MP).”
Iha Segunda informasaun loron hanesan iha oras tuku 8 dader UPF mos asegura sidadaun feto ida ho inisial ANC. Feto ne’e diskunfia fasilita sasan kontrabandu husi Indonesia mai Timor-Leste.
“Sasan ne’ebé mak UPF sira prende mak farda grupu Arte-marsiais nian depois ami prende submete kedas ba prosesu investigasaun.”
Jornalista : Chay Risky