Loluwari Média (Díli) – Ministru Defeza (MD), Kontra Almirante, Donanciano Costa Gomes “Pedro Klamar Fuik”, ofisiálmente entrega viatura tatika hamutuk 18, ba Instituisaun Forsa Defeza Timor-Leste (F-FDTL), Transporte ne’e ho marka Baic 10 no Isuzu 8 atu hala’o nia knaar ho profesionál no Moderniza.
“Ohin ita oferese tan ekipamentu viatura tatika 18 ba instituisaun F-FDTL, ha’u nia felisita ba Instituisaun F-FDTL tan meius ne’ebé adekuadu tanba ita hotu hatene tinan 20 resin ba kotuk ita halo transformasaun Falintil mai F-FDTL, ita iha de’it viatura ida maibé ho tempu no evolusaun ita transforma no atrubui meius modernu ba ita nia F-FDTL hala’o misaun Profisionaliza no moderniza.” Dehan Ministru Defeza (MD), Kontra Almirante, Donanciano Costa Gomes “Pedro Klamar Fuik”, ba jornalista sira, iha kuartel General Fatuhada Dili, sexta (04/07).
Governante ne’e, esplika, husi meius viatura tatika ne’e iha 2 ida viatura tatika administrativa no ida seluk viatura tatika pesoal. sosa husi kompaña Dus no Fortuna Star husi Kompaña Dus, viatura tatika ho marka Baic hamutuk 10 no husi Kompaña Fortuna Star viatura tatika ho marka Isuzu 8.
“Ha’u husu ba Instituisaun F-FDTL ne’ebé hetan atribuisaun meius foun presiza iha gestaun atu ba iha meius ne’e ho didiak. Ha’u husu General F-FDTL atu kontrolu ida ho rigurozu ba viatura tatika sira ne’e atu bele uza hodi kumpri misaun F-FDTL nian no meius sira ne’e bele dura atu nune’e F-FDTL bele utiliza hodi servi ita nia rai.”
Ministeriu Defeza esforsu no sakrifíka ba administrativa balu husi MD hodi bele halo akizasaun ba meius tatikus administrativus ne’ebé F-FDTL iha hanesan transporte pesoal no transporte administrativa nian.
“Viatura tatika ne’e la’os tama ba enkuadramentu lei Programasaun militár nian maibé ida ne’e mudansa artigu ba akizasaun husi kareta tatika ba kombate ne’ebé ami planea 4, maibe lakon responde ho realidade ne’ebé F-FDTL iha tanba ne’e ha’u deside konsela re-enkamina ba iha akizasaun viatura tatika 8 nia orsamentu 2024 nian ho nia montante 1 mill 800 dolares Amerikano.”
Xefe Estadu Maiór Jenerál Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek”, agradese ba Ministru Defeza nia apoiu mai instituisaun F-FDTL ho ekipamentu viatura tatika ne’ebé neneik maibé bebeik nune’e F-FDTL bele hala’o nia misaun ho Profesionál no Moderniza.
“Ha’u husu ba Xefe Estadu Maior sira atu ita atualiza ba iha transporte nian ne’e ho rigurozu, tanba ita iha ona diretiva ida ne’ebé atu kontrola ba transporte viatura tatika sira ne’ebé apoiu husi Ministeriu Defeza. Ha’u husu atu utiliza transporte hirak ne’e ho responsabilidade no uza ba nesidade instituisaun F-FDTL nian.”
Husu ba Xefe Viatura atu kontrola didiak liu ba motorista no mos ba mekanika sira atu kontrola transporte ne’e tu’ir regras ne’ebé estabelese tiha ona tanba asidente ne’ebé akontese iha Timor ne’e inkapasidade husi motorista sira tanba la obedese regra sira ne’ebé iha ona.
“Tanba ne’e ha’u husu simu sasan ho responsabilidade ha’u husu mos ba Xefe Estadu Maior sira atu kontrola no tau regulamentu ho rigurozu ba motorista sira ne’ebé utiliza viatura tatika sira ne’e ha’u husu atu ita hotu kontribui ba Instituisaun F-FDTL.”
“Uluk ema barak lakon nia vida ba rai ida ne’e ohin loron nasaun hetan nia independénsia ohin loron Instituisaun F-FDTL moderniza oinsa atu halo professional liu tan atu nune’e heroinu no heroina sira bele kontente.”
“Ha’u husu ba membru F-FDTL hotu atu sai servidor ba rai ida ne’e liu ba ita nia soberania tanba ita iha istória libertasaun ne’ebé diferente ho ema seluk iha mundu.”
Jornalista : Chay Risky