Loluwari Média (Dili) – Governu liuhusi Ministériu Assuntu Kombatente Libertasaun Nasionál (MAKLN) no Komisaun Konsellu kombatente Libertasaun Nasionál (CCLN), lansa fatuk dahuluk ba banco do Nosso Futuro (BNF) ba Veteranu sira.
Prezidente konsellu kombatentes Libertasaun Nasionál (CCLN), Vidal de Jesus “Riak Leman”, hatete, ohin lansa ona futuru veteranu bele halo programa oioin husi Fundu kontributivu veteranu ne’e.
“Ohin loron ne’e importante tebes hodi halo lansamentu ba “Banco do Nosso Futuro”, veteranu nian. Banku hamri’ik hodi atende veteranu sira ba kréditu hodi halo atividade sira”, Dehan Prezidente CCLN, Vidal de Jesus “Riak Leman”, iha Colmera, Dili, segunda (07/07).
Eis representante povu ne’e hatete, lansamentu atu prepara banku ida iha futuru ba veteranu sira bainhira funsiona no fasilita veteranu sira mak sei hanoin atu loke tan iha área pekuária, tanba aproxima ona ho Ministériu Agrikultura Peska.
Entretantu kontributivu Veteranus hamutuk $ 50 mil no Veteranus hamutuk 27.600 resin, alende ne’e konstrusaun ba BNF $ 5 Mill, nune’e kompaña ne’ebé atu halo konstrusaun ba Banco o Nosso Futuru ne’e mak, Compaña Nasionál dos Combatentes no Veteranus, Sosiedade Anomima (CNCV, SA), Joint venture, no Carlos Timor-Leste (CTL) ho durasaun tinan 1 hahu ho fulan juñu tinan 2025 ne’e.
“Fundu kontributivu veteranu kuaze milaun $ 50 ho veteranu hamutuk 27.600 resin, entretantu osan ba konstrusaun BNF hamutuk miliaun $ 5. Compaña Nacional dos Combatentes e Veteranos, Sosiedade Anonima (CNCV, SA), Joint Venture ho Caria Timor-Leste, (CTL) ho durasaun tinan ida, hahú fulan ne’e”.
Esperansa husi estabelesimentu ida ne’e ba oin sei servisu diak liu ho parte relevante sira hodi finaliza konstrusaun banku nasional ida rekomendasaun husi inan-aman, veteranu sira kona-ba atu hari’i tan edifisiu saúde ba veteranu, no mós loke Universidade iha Timor.
Ministru Assuntu Kombatente Libertasaun Nasionál (MAKLN), Gil da Costa Monteiro “Oan Soru”, hatete, presenza governu nian nu’udar testamuña ba lansamentu fatuk dahuluk ba Banku Nasionál Futuru Veteranu.
“Eventu ida ohin importante tebes ba nasaun ida ne’e tanba lansamentu ida ne’e atu garantia ba banku ida ba futuru, ohin ha’u lori veteranu sira nia naran hato’o agradese wa’in ba ita bo’ot sira nia prezensa pasajen badak ne’ebé ohin ne’e la’ós fasil maibé difisil tebes maibé ha’u atu dehan ba ita bo’ot sira labele hanoin difisil ne’e tanba se ita hanoin hanesan ne’e servisu hotu la la’o ona”.nia dehan.
Oan Soru hatete, sujestaun ne’ebé inan-aman veteranu sira husu iha momentu ne’ebá iha asuntu tolu hanesan hari’i banku ida ho própriu ba iha rai ida ne’e, hari’i ospital no universidade ida.
“Ohin hotu-hotu iha ne’e sai ona testamuña ba lansamentu fatuk dahuluk ba sujestaun ne’ebé husi inan-aman sira nian katak hari’i Banku Nasionál ba futuru veteranu iha rai ida ne’e”, Oan Soru afirma.
Diretór Ezekutivu CNCV, Domingos do Santos Siqueiro, hatete, Empreza CNCV hetan parseria ho Caria Timor-Leste ne’ebé konsultan fó tinan ida ba konstrusaun.
“Posivelmente ho hanoin ida katak antes tinan ida bele remata nune’e bele fó mensajen di’ak ba veteranu sira ne’ebé koa osan, Pro-projetu ne’e iha faze rua, ida empreza kaer ne’e ba konstrusaun ne’e de’it no parte interiór husi banku ne’e kompaña seluk mak kaer”,
Jornalista : Anis