Loluwari Média (Bobonaro) – Anita Olo-Lesu tinan 63, nu’udar inan faluk ne’ebe moris ho família laiha hela fatin permanente, durante ne’e hela hamutuk ho família seluk iha uma ida ho kondisaun mínimu tebes, iha aldeia Atublogo, suku Colimau, postu-administrativu Bobonaro, munisípiu Bobonaro,
Inan faluk Anita, ho oan na’in 6 ho idade menus 25, no oan mane ne’ebé inan-faluk ne’e laran metin, infelizmente moris mai ho kondisaun difisiénsia iha liman no labele halo servisu normal ba nia família.
Ho esforsu ba hahan lor-loron, Inan-faluk, Anita hamutuk ho oan feto sira mak buka hahan liuhusi vida agrikultura hodi sustenta nesesidade moris. Maibé tanba idade Anita, laiha kbi’it atu halo servisu hodi sustenta oan sira.
Iha 2024, ekipa diresaun Sosiedade Sivíl no Apoiu Sosiál Prezidénsia Repúblika (SSAS-PR),ne’ebé lidera husi Assesór Quintiliano Moníz, identifika no hetan aprovasaun husi Prezidente Repúblika, Jose Ramos-Horta, hodi konstrui uma atu oferese ba família Anita ho medida 7×5, kompostu husi kuartu rua, sala vizita ida, haris-fatin, dapur no mini-kios inklui mobiliáriu iha uma-laran.
“Uma refere konstrui durante fulan 3 husi ekipa badaen SSAS-PR ho totál orsamentu $14.000 husi orsamentu Prezidénsia Repúblika no doadores sira.
Nune’e, iha 08 Jullu ne’e, Prezidente Repúblika, Jose Ramos-Horta, delega Assesór Prinsipál Assuntu Polítiku, Jenerál Reformadu, Tito da Costa “Lere Anan Timur”, entrega uma refere ba inan faluk Anita, akompaña husi Adjuntu Xefe Casa Militar Prezidénsia Repúblika, Superintendente Assistente polisia, Luis Soares Barreto, no autoriedade lokál.
Ho mataben Inan faluk Anita, expresa nia sentimentu orgullu hodi dehan obrigadu ba Prezidente Ramos-Horta no Avô Xanana tanbá bele halo uma ba ami, no obrigadu Avô Lere ne’ebé ohin mai entrega ona uma ne’e.
Hafoin entrega uma, Jenerál reformadu (Ref), Lere Anan Timur, kontinua fahe nessesidade bázika ba família kbi’it nato’on sira, iha suku Colimau, tu’ir pedidu husi autoriedade lokál ho totál benefisiáriu hamutuk 80. Além entrega apoiu sosiál,
Assesór Prinsipál ne’e, hala’o mos mini-diálogu ho komunidade no veteranu suku Colimau, hodi ko’alia kona-bá problema sosiál ne’ebé povu iha baze infrenta, no mos kona-bá assuntu veteranu inklui hato’o mensájem dame ba família bo’ot suku Colimau.
“Uma ne’e loloos, entrega husi PR, maibé hanesan aman ba nasaun, haruka ha’u mak mai. Apoiu ne’e tu’ir kbi’it Prezidénsia Repúblika nian hodi tulun malu hanesan Timor-oan no hanesan ukun-na’in.
Hanesan Maun Xanana dehan, Povu mak Heroi, sira ne’e mak heroi ne’ebé sei moris, presijza duni tulun.” Dehan Assesór Prinsipál Assuntu Polítiku, Jenerál Reformadu, Tito da Costa “Lere Anan Timur”, ba jornalista sira, iha suku Colimau, tersa (08/07).
Lere Esplika liu tan, apoiu sira ne’ebé Prezidente, Ramos-Horta, iha la’ós foin mak hahu maibé iha fatin barak akontese ona désde simu posse iha 2022.
“Nesessidade báziku ba família kbi’it naton sira mak hanesan fós, manu tolu, mina ba tein no parsél ne’ebé apoiu husi grupu NIPPON Japaun.
Jornalista : Chay Risky