Loluwari Média (Díli) – Diretór Diresaun Investigasaun Kriminál Nasionál (DDIKN), Superintendente Polísia, João Belo dos Reis, informa, horseik mais ou menus tuku 11, komunidade hetan joven ida ne’ebé mate ho misteriu iha areadores Jakarta II munisípiu Ainaro postu administrativu Ainaro.
“Iha akontesementu mistériu ne’e ita nia komunidade informa imediata ba ita nia komandu munisípiu Ainaro, katak sira hetan mate isin ida ho nia motor inklui ho nia ekipamentus balu iha rai lolon Jakarta II nian.” Dehan Diretór Diresaun Investigasaun Kriminál Nasionál (DDIKN), Superintendente Polísia, João Belo dos Reis, ba jornalista sira, iha Komandu Jerál PNTL, Kaikoli, Dili, (07/07).
Belo hatete, Autoridade Seguransa munisípiu Ainaro imediata ba halo intervensaun ba mate isin refere.
“Ita nia komandu munisípiu Ainaro halo intervensaun ba mate isin ho naran, Peregrina da Conceição, naran istimada, Anina, ho idade 23 ne’ebé mate iha Ainaro Jakarta II.”
Servisu informasaun Polísia no servisu Investigasaun Kriminál hamutuk ho Komandu munisípiu Ainaro inklui komandu munisípiu Liquiça halo treaking ba informasaun ne’ebé PNTL rekolla no ikus mai hori kalan mais ou menus tuku 09 kalan suspeitu PNTL kaptura iha area Dom Aleixo munisípiu Díli.
“Agora daudaun suspeitu ita asegura ona iha PNTL nia liman hodi kumpri sela detensaun Eskuadra Dom Alexo Comoro, Dili nian no mate isin horseik kedas ita evakua mai iha Hospital Nasional Guido Valadares (HNGV) hodi halo prosesu Autopsia.”
Iha kazu ne’e rasik nia prosesu sei la’o hela investigasaun nia laran sidadaun ne’e mate, oinsa prosesu investigasaun la’o hela no hein prosesu autopsia mak determina tanba ho evidénsia motorizada ida no sasan balu tanba vitima husi suku Asumanu postu administrativu Liquiça munisípiu Liquiça.
Jornalista : Chay Risky