Loluwari Média (Díli) – Diretór Diresaun Investigasaun Kriminál Nasionál (DIKN), Superintendente Polísia, João Belo dos Reis, hatete, operasaun Polísia Nasionál Timor-Leste (PNTL) liuhusi Unidade Patrullamentu Fronteira (UPF), hala’o operasaun ba sidadaun Timoroan 90 resin ne’ebé liuhusi dalan ilegal ba tu’ir OAM iha Indonésia.
“Operasaun konjuta husi Servisu Informasaun Polísia UPF no autoridade seguransa sira seluk ne’ebé destaka iha Fronteira halo kapturasaun ba ita nia sidadaun sira ne’ebé halo movimentu iha fronteira liuhusi dalan illegal, ami konsege kaptura sidadaun Timor oan na’in 90 resin inklui ho evidénsia atributu Arte Marsiais nian.” Dehan Diretór Diresaun Investigasaun Kriminál Nasionál (DIKN), Superintendente Polísia, João Belo dos Reis, ba jornalista sira, iha Komandu Jerál PNTL, Kaikoli, Dili, kuarta (09/07).
Belo esplika, sidadaun Timor oan sira ne’e ultrapasa liña Fronteira ilegal ho intensaun atu ba sa’e sintu husi Arte-Marsiais nian.
“Iha operasaun ne’e ita mos prende osan $ 2 mill dolares Amerikanu inklui Kilat Anin (Senapan Angin) ne’ebé ita nia sidadaun Timor oan ne’ebé iha mota sorin lori mai iha Timor-Leste, no mos ita prende Asu 2 tanba ita nia sidadaun timoroan sira lori husi Indonesia mai Timor.”
Informasaun tolu ne’ebé PNTL fo sai relasiona ho animal Asu atu fo hanoin katak agora daudaun moras asu nian ou rabies agora la’o hela Autoridade Seguransa PNTL husu sidadaun atu evita importa kualkér animal, liliu asu husi nasaun viziñu mai Timor-Leste.
“Asu ne’e bele fo nia risku mai ita, animal sira iha ita nia rai laran, ami mos husu ba sidadaun sira atu hakat liña Fronteira tenke tu’ir prosedimentu legais ne’ebé ita iha tanba ami laiha autorizasun mak imi tenta atu tama ho dalan illegal, ami sei foti asaun rigurozu.”
PNTL husu nafatin ba inan-aman sira atu kontrola oan sira liliu iha nesesidade ruma ba iha nasaun viziñu tenke ho dalan legal tanba Arte-Marsiais iha Timor-Leste IX governu Konstitusionál bandu ona tanba ne’e husu Timoroan atu kumpri desizaun governu.
Komandante Unidade Patrullamentu Fronteira (UPF), Superintendente Polísia, Euclides Belo, hatete, UPF garante nafatin Seguransa iha liña Fronteira bainhira sidadaun ne’ebé mak kumpri regras ou tama illegal, UPF laiha operasaun seluk, UPF foti medidas tu’ir prosedimentu legais ne’ebé iha.
“Numeru sidadaun ne’ebé ami identifika no halo kapturasaun hamutuk 90 resin, no ami nia operasaun sei la’o hela, tanba ne’e mak ami husu ba sidadaun sira atu kumpri pontu entrada husi Batugade, Mota Masin, Sakato no Oesilo se bainhira sidadaun sira la kumpri mak ami sei halo asaun rigurozu ba imi.”
Dalan ilegal ou Klandestina ne’e proibidu ba sidadaun sira, bainhira insidente ruma se mak iha responsabilidade, tanba ne’e husu ba sidadaun sira hotu atu kumpri regras iha liña fronteira bainhira fronteira seguru ema hotu nia movimentu mos ho seguru.
Jornalista : Chay Risky