Loluwari Média (Díli) – Komandante Jerál Polísia Nasionál Timor-Leste (PNTL), Komisariu Jerál, Henrique da Costa, fo promosaun tranzitoria Diviza ba Membru PNTL na’in 4, kompostu husi Roberto Lopez, promove ba Sargentu xefe, Sipriano dos Reis Santos, promove ba Primeiru Sarjentu, José Belo, promove ba Primeiru Sarjentu no Victor Belo, promove ba Primeiru Sarjentu.
“Ita agradese ba Maromak tanba ita hotu bele hasoru malu iha dader kmanek ida ne’e hodi tula deviza ba membru PNTL na’in 4, tanba seremonia impozisaun deviza ne’e husi loron 27 Marsu nia kontinuasaun to’o ohin loron.” Dehan Komandante Jerál PNTL, Komisariu Jerál, Henrique da Costa, ba jornalista sira, iha kuartél Jerál PNTL Kaikoli, Dili, kuarta (09/07).
Superior ne’e esplika, promosaun deviza tranzitoriu ba iha Komandu munisípiu sira hotu ona, no mos ba Unidade sira hotu ona maibé membru na’in 4 ne’e seidauk hetan, tanba ne’e ohin sira bele simu direita iha Kuartel Jerál PNTL.
“Ita nia membru na’in 4 ne’e nia kondisaun ladun permite, tanba ne’e ohin ita fo promosaun Diviza ba sira na’in 4 mak Diretór Logistika, Administrasaun Tranzitu no mos munisípiu Lautém nian ne’ebé bele lao to’o mai Komandu Jerál PNTL, ohin ita fo diviza ba sira.”
Komandu la husik nia membru balu iha kontuk tanba ho esforsu sakrifísiu ne’ebé imi dedika ba Instituisaun PNTL no ba rai ida ne’e ohin loron governu valoriza ho promosaun tranzitoria Diviza ba imi hotu.
“Promosaun tranzitoria Diviza ne’e rekuñesimentu ba membru PNTL nia dedikasaun no servisu ne’ebé durante imi hala’o ne’ebé agradese tebes ba imi hotu nia dedikasaun no konstrusaun ba ita nia instituisaun PNTL liu ba rai no povu ida ne’e.”
Maske ohin loron imi nia kondisaun moras no idade ba bebeik ona maibé Instituisaun PNTL nafatin rekuñese no sura mos ho imi nia kontribuisaun no dedikasaun durante ne’e tanba Instituisaun PNTL nia dezenvolvimentu sura mos ho imi hotu.
Jornalista : Chay Risky