Loluwari Média (Díli) – Jogu kontinuasaun faze grupu Comunidade Países Lingua Portuguesa (CPLP) Angola rekolla pontu tolu hafoin halakon nia adversariu Cabo Verde ho rezultadu 2-0 iha Estadiu Munisípal Díli.
Angola rekolla pontu 3 husi nia adversariu Cabo Verde ho rezultadu (2-0) iha estadiu Munisípal Dili, Domingu (20/07).
Jogu inisiu iha primeira parte ekipa rua lansa atake, tu’ir tatika no estratejia ne’ebé treinador sira prepara atu rekolla rezultadu pozitivu iha jogu hodi nune’e hakat ba faze tuir mai.
Jogu ne’ebé lidera husi arbitrajen, Bernardinho Marcarenhas, Juiz Laña, Henrique Martins no Januario Salsinha, no arbitu rejerva Rodrigo. Jogador Varela no Pedro Dinis hodi lansa kontra atake ba liña defeza ekipa adversariu atu kolleta pontus 3.
Prezensa adeptus sira mos anima tebes jogador sira hodi hatudu sira nia abilidade no determinasaun jogu ne’ebé anima tebes adeptus husi ekipa rua, fo sira nia apoiu liuhusi hananu no hakilar inklui basa liman ba sira nia ekipa favoritu.
Angola hahu jogu ho tatiku atake ho bola aas atu realiza golu. Enkuantu ekipa adversariu Cabo Verde halo presaun aas ho tatiku tiki-taka atu halo balansu jogu ho (long ball) bola long, maske nune’e esforsu hirak ne’e seidauk iha rezulta golu.
Ekipa adversariu Cabo Verde halo mudansa tatiku iha liña mediu atu halo balansu jogu, maibe esforsu hirak ne’e seidauk iha finalidade no ekipa rua kontinua halo jogu ne’ebé anima tebes nia adeptus sira, to’o primeira parte termina ekipa rua mantein rezultadu 0-0.
Kontinuasaun iha segunda parte ekipa rua kontinua halo kontra atake ba malu hodi rekolla pontu importante iha jogu ne’ebé diak. Iha minutu 45 jogadór Angola Pedro Antonio ho numeru kamijola 15 konsege realiza golu ida ba nia ekipa hodi lidera jogu 1-0.
Iha minutu 64 Angola kontinua aumenta tan golu ida liuhusi nia jogador, Manuel Pires ho numeru kamijola 11 ba 2-0, halo kontente nia adeptus sira inklui mos ba nia nasaun tanba hetan vitoria iha jogu ne’e.
Maske lidera golu Angola kontinua lansa atake ba ekipa adversariu Cabo Verde, rezultadu jogu ne’e halo ekipa Cabo Verde sempre falla iha atake no stamina jogador sira hahu tun, situasaun ne’e halo ekipa Angola fiar an no kria opurtunidade no halo esforsu makaas halo ekipa adversariu difisil halo balansu jogu ne’ebé atrativu.
Iha minutu ikus Angola kontinua fo presaun ba ekipa adversariu maske lakon ekipa Cabo Verde mos nafatin halo esforsu atu halo empata jogu, maibé mehi ne’e la realiza tanba ekipa Angola konsege lidera ho skor 2-0 nune’e Cabo Verde mos lakohi lakon le’et de’it to’o jogu ne’e termina halo jogu ne’e anima tebes adeptus sira.
Iha minutu 90 nia laran laiha tan golu ruma mak ekipa rua prodúz no aumenta tan adisinal minutu 4 rezultadu 2-0 mantein to’o jogu termina.
Jornalista : Chay Risky