Loluwari Média (Díli) – iha inisiu jogu arbitru fo sinál, ekipa rua lansa kedas kontra atake ba malu tu’ir tatika no estratejia treinador orienta nia jogador sira atu hetan rezultadu maximu.
Ekipa rua hala’o jogu ho ritmu ne’ebé as, maibé ekipa Portugál ne’ebé hala’o jogu agresivu, ho bola ne’ebé husi ain ba ain, ho ambisaun hodi bele produz golu, maibé liña defeza Cabo verde ne’ebé solidu no la fo opurtunidade ba nia adversariu atu realiza golu iha estadiu Munisípal Díli, kinta (24/07).
Ekipa selesão das Quinhas alias ekipa Portugál koko domina iha jogu, hodi fo presaun ba liña defeza Cabo Verde, maibé Cabo Verde konsege halo balansu ba jogu, liuhusi kontra atake hodi sobu liña defeza ekipa selesaun das Quiñas naran estimadu ekipa nasional Portugál.
Maske nune’e, sira la hatudu sira nia ofensidade iha jogu hodi husik adversáriu sira aproveita opurtunidade hodi lansa ameasa ne’ebé fo perigu ba guarda rede.
Ekipa Cabo Verde ne’ebé lansa kontra atake ne’ebé lais, halo liña defensivu selesão das Quinhas tenke gasta enerjia hodi bele hamate liña avansadu Cabo Verde.
Iha minutu 37 Cabo Verde hetan opurtunidade atu marka golu aproveita fallansu jogador defeza adversáriu, maibé la konsege, ho opurtunidade ne’ebé Cabo Verde hetan liuhusi lansa bola kantu, jogadór António Pedro ho numeru kamizola 7 konsege fura guarda rede portugál nian hodi lidera jogu iha primeira parte ho rezultadu 1-0 to’o primeira parte termina.
Iha segunda parte ekipa Cabo Verde lansa atake ne’ebé agresivu, nune’e halo presaun ba ekipa seleção das Quinhas liuhusi liña mediu parte los, hodi lansa sutu maibé seidauk kona alvu tanba defeza portugál antisipa bola ho diak.
Ekipa rua halo kontra atake ba malu hodi hadau malu opurtunidade atu aumenta golu no responde golu, maibé la konsege, tanba esforsu hirak ne’e seidauk kona nia alvu.
Iha kampu ninin treinadór sira orienta jogador sira atu muda estartejia liuhusi substituisaun jogador sira atu halo balansu jogu.
Atmosfera estadiu munispiu Dili barullu liu tan husi adeptus sira ne’ebé hakilar no haklalak, hodi fo suporta maximu ba ida-idak nia ekipa.
Iha minutu 87 jogador husi ekipa cabo Verde konsege aumenta tan golu ba 2-0 liuhusi jogadór numeru kamizola 09. Golu refere mantein to’o jogu termina.
Golu ne’e hakohi esperansa ekipa seleção das Quinhas atu rekola medalla osan maen iha jogu CPLP.
Maske sofre golu 2 ekipa seleção das Quinhas kontinua halo kontra atake hodi bele responde golu ruma, maibe liña defeza Cabo Verde mantein solidu.
Jornalista : Chay Risky