Loluwari Média (Maliana) – Prezidénsia Repúblika (PR), liuhusi Unidade Servisu Solidariedade no Apoiu Sosiál, kontínua kontribui dezenvolvimentu edukativu kultural iha komunidade. Nune’e Prezidénsia entrega instrumentu múzika ba Kongregasaun Komunidade Santa Madalena de Canosa Maliana, iha postu Maliana, munisípiu Bobonaro.
Ekipamentus múzika ne’ebé entrega ba kongregasaun komunidade Santa Madalena de Canossa Malian, nu’udar forma solidariedade no investimentu ba edukasaun ba beioan sira, hahu ho esperansa instrumentu múzika sira ne’e sei ajuda motiva no dezenvolve kapasidade artístiku no kultural ba labarik sira ne’ebé hela iha asrama.
Responsavel Kongregasaun Santa Madalena de Canossa, Irmã Maria Soares Pinto, agradese ba Prezidente Repúblika (PR), José Ramos-Horta, tanba fó ona atensaun no apoiu ba labarik ki’ik-oan sira ne’ebé oras ne’e daudauk hala’o prosesu aprendizajen iha Canosiana Maliana.
“Ami hato’o obrigadu no gratidaun ba Exelénsia Prezidente Repúblika, tanba suporta ona ami nia beioan sira. Ho ekipamentus Instrumentu múzika sira ne’e sei fó opurtunidade ba ita nia beioan sira atu ne’e sira bele aprende, hodi bele deskobre sira nia talentu no prepara sira ba futuru ne’ebé di’ak liu.” Dehan, Responsavel ba Kongregasaun, Irmã Maria Soares Pinto, ba jornalista sira iha Canosiana Maliana, Tersa (05/08).
Nia hatete, Inisiativa apoiu ne’e fó sinal klaru Prezidente Repúblika nia kompromisiu no kontinua atu sustenta programa edukasaun informal ho objetivu fó esperansa no mudansa pozitivu ba gerasaun foun Timor-Leste nian.
“Ho inisiativa ne’ebé ita nia sua exelensia Prezidente Repúblika oferese ba ita nia Beioan sira ne’e atu hafanu edukasaun informal sira atu iha esperansa ba mudansa pozitivu ba ita nia gerasaun sira nia futuru.”
Jornalista : Chay Risky