Loluwari Média (Dili) – Jogu kontinuasaun faze grupu kompetisaun futeból salaun Futsal Makalero 2025, ekipa Irama FC rekolla pontu 3 iha jogu ikus hasoru nia adversariu Lero Tasi Tolu iha kampu futsal polisia militar Quintal Bo’ot, segunda (25/08) ho rezultadu 4-0.
Inisiu jogu primeira parte ekipa Irama FC ne’ebé antes ne’e derota mai ho konfidensia atu rekolla pontu olu nune’e belo hakat ba faze tuir mai. Ekipa Irama FC mai ho motivasaun no determinasaun no hatudu jogu ne’ebé atrativu no anima adeptus sira maibé misaun atu hetan vitoria iha kompetisaun Makalero Cup 2025.
Jogu ne’ebé ekipa rua hala’o fo animasaun ba adeptus sira ne’ebé mai asiste direita iha kampu futsal polisia militar Quintal Bo’ot husi parte Lorosa’e ho kontente fo sira nia apoiu maximu ba ekipa Irama atu rekolla pontu tolu nuene’e bele hakat ba faze segundu.
Ekipa Irama FC kontinua hatudu dominasaun jogu liuhusi pasajen ne’ebé furak no determinasaun no akurasaun husi jogador ne’ebé konsege formula tatika treinador iha kampu atu rekolla pontu tolu nune’e bele hakat ba etapa tuir mai.
Iha inisiu jogu maske ekipa Irama FC domina jogu maibé difisil atu realiza golu ba nia adversariu Lero Tasi Tolu FC ne’ebé halo kontra atake makaas nune’e Irama FC tenke buka frakeza husi ekipa adversariu hodi atu realiza golu.
Kapitaun ekipa Irama FC, Denus Cardoso ho numeru kamizola kamizola 11 konsege fura guarda rede Lero Tasi Tolu FC, nune’e Irama FC lidera 1-0. Golu ne’e motiva tebes no anima adeptus Irama kontente no suporta nia ekipa ho yel yel Irama, Irama.
Golu ne’e halo ekipa adversariu mos halo atake ba liña defensive Irama FC, maibé Irama kontinua ritmu jogu ne’ebé iha ho kontra atake no dominasaun konsege aumenta tan sira golu liuhusi jogador Samuel ho numeru kamizola 92 iha minute 10, Irama lidera jogu ho 2-0. Rezultadu ne’e mantein to’o primeira parte termina.
Jogu kontinua ba segunda parte Irama ho fiar an ho determinasaun no dominasaun jogu maibé kontinua asegura atu nune’e ekipa adversariu labele hatama golu tanba iha jogu daruak Irama FC sofre golu 4. Iha meiu segunda parte Irama aumenta tan golu furak ida husi Ameta ho numeru kamizola 17 ho suta first time ne’ebé konsege hamate pasu husi guarda rede ekipa adversariu, Irama lidera 3-0.
Maske sofre 3-0 ekipa adversariu nafatin halo kontra atake iha liña defensivu ekipa Irama FC maske nune’e ho golu 3 ne’e halo Irama FC fasil domina jogu iha liña klaran no defensivu nune’e difisil ba ekipa adversariu atu halo balansu jogu no sempre lakon bola nune’e Irama fasil halo jogu no konsege realiza tan golu dahaat liuhusi jogador ho naran istimadu Apeu ho numeru kamizola 28 no Irama lidera 4-0.
Ho rezultadu 4-0 iha jogu ikus ne’e provizoriu Irama okupa 3 klasifikasaun faze grupu ho pontu 4 husi jogu tolu kompostu husi manan, impata no lakon total hatama golu 7 no sofre golu 6 signifika Irama iha bola ida, pontus hanesan Unidade Tirilolo, maibé falta jogu ikus hasoru ekipa Cainlio FC ne’ebé daudauk ne’e lidera tabela klasifikasaun ho pontu 6 husi jogu 2 manan dala 2.
Treinador Irama FC. Salis Cardoso, hatete, rezultadu jogu ne’e importante tebes atu ekipa bele iha opurtunidade hakat ba faze tu’ir mai no ekipa sei halo avaliasaun jogu bainhira hetan opurtunidade iha jogu tuir mai.
“Ha’u hanoin jogu ohin ne’e ita nia tarjetu tenke manan ho golu ne’ebé bo’ot atu iha opurtunidade iha jogu tuir mai. Maibé ha’u fiar ekipa ohin halo jogu ne’ebé diak tebes. Rezultadu ne’ebé ekipa hetan tanba esforsu atu mantein iha kopa ne’e iha etapa tuir mai.’
Ekipa Loluwari