Loluwari Média (RAEOA) – Iha aldeia Bihala, suku Bobocase, Região Administrativu Espesiál Oé-Cusse Ambeno (RAEOA), inan faluk, Balbina Beno, ho oan kiak na’in 2, simu uma foun husi Prezidénsia Repúblika, liuhusi Unidade Servisu Sosiedade Sivil no Assuntu Sosiál (SSAS). Seremónia entrega uma foun ne’e hala’o ohin Sexta, partisipa husi autoridade lokál no ekipa SSAS ne’ebé lidera husi Asesor Prinsipal Quintiliano Moniz Carvalho.
Uma foun ne’e konstrui hafoin hetan observasaun direita husi ekipa SSAS no autoridade lokál, ne’ebé identifika kondisaun moris avô Balbina ho nia oan na’in 2 sente la seguru, tanba antes ne’e hela de’it iha baraka ida, susar tebes bainhira akontese tempu udan no anin bo’ot. Avó Balbina, ne’ebé kaben mate iha 2001, hela hela moris moruk ho oan kiak na’in rua to’o agora.
Iha entrevista ho media, inan faluk, Balbina Beno, hato’o nia agradesimentu ho mata-ben.
“Ha’u kontente tanba bo’ot sira oferese uma ne’e mai ha’u. Kontente tebes bo’ot sira fó uma ne’e no ha’u simu ho liman 2.” Dehan Inan Faluk, Balbina Beno, ba jornalista sira, iha Pantemakasar, RAEOA, sexta (29/08).
Asesor Prinsipal prezidente republika, Quintiliano Moniz Carvalho, subliña, projetu ne’e parte husi lideransa nasional nia vizita no komprimisiu ba povu.
“Ami mai hatutan ita nia aman, Primeiru Ministru Kay Rala Xanana Gusmão no Prezidente Repúblika Dr. José Ramos-Horta, hamutuk ho Autoridade no ita bo’ot sira atu entrega uma ida ne’e ba ita nia ama Balbina ho nia oan.”
Konstrusaun uma hahú iha 13 Maiu 2025 no remata iha 8 Agostu 2025. Uma foun ne’e, ho medida 8×7 metru, iha kuartu rua, sala vizita, dapur, haris-fatin no kios ida atu ajuda sustenta ekonomia família nian.
Xefe suku Bobocase, Thomas Nessi, hato’o agradesementu ba governu sentral liliu prezidensia republika nia inisiativa hodi hari’I uma dignu ba inan faluk Beno no ema kbi’it laek sira.
“Primeira vez ami nia komunidade hetan uma dignu hanesan ne’e. Agradese ba governu Sentrál, liliu ba Prezidente Repúblika, Exelénsia Dr. José Ramos-Horta, ne’ebé hatan ona ami nia pedidu ho lalais.”
Alénde entrega uma ne’e, ekipa Prezidénsia mos distribui nesesidade bázika ba família vulnerável no ema ho defisiénsia na’in 50, inklui distribui mos sasan desportu ba juventude iha suku ne’e tu’ir pedidu autoridade lokál nian.
Seremónia entrega uma foun ne’e konsidera nu’udar sinál solidariedade no esperansa ba família vulnerável sira iha Timor-Leste.
Jornalista : Chay Risky