Loluwari Media (Dili) – Sekretaria Estadu Formasaun Profisional no Empregu (SEFOPE), husu ho konsensia traballadór sira ne’ebé molok ba servisu iha Austrália tenke hela atributu artemarsiál iha Timor-Leste.
Sekretáriu Estadu SEFOPE, Rogerio Araujo Mendonça, husu ba traballadór timoroan sira ne’ebé mak tempu badak atu ba servisu iha Australia atu rai hela farda artemarsiais iha armariu molok ba servisu iha estranjeiru.
“Ha’u hatene katak balu tuir hela arte balu tuir hela artemarsiál sira ne’e,arte ritual sira ne’e, diak liu imi nia kamiza ka imi nia farda sira ida trenu nian hasai tau hela ba armariu fo hela ba imi nia familia sira, lalika lori hodi ba trenu ida ne’e, ba trenu ida ne’eba”Dehan Sefope Rogerio Arauzo Mendonca ba jornalista sira iha Salaun Novu Turizmu Kinta (05/03).
Sekretáriu Estadu husu tanba traballadór na’in 62 ne’ebé foin primeira vez ba Austrália labele lori atributu atu evita problema iha ema nia rai.
“Ne’ebé atu hatete de’it 22 traballadór ne’ebé mak iha Australia ne’e problema ida arte ne’e, ne’e laiha ate a data ne’e la iha nem atu sona malu fali ga Ema atu baku malu laiha, imi ida 62 iha ne’eba ne’e di’ak liu halakon tiha, hanesan ohin hau dehan”dehan nia.
Nia haktuir, balun ne’ebé mak ho arte marsiais di’ak liu kamizola sira ne’e fó hela ba inan-aman atu bainhira fulan 9 fila-fali mai TL mak utiliza hodi evita provoka malu iha Austrália.
“Tanba Ida ne’e hau husu nafatin imi ida 135 ne’e imi laiha lorosa’e imi laiha loro rai klaran laiha loro monu imi uza bandeira sapeu ne’e imi uza bandeira RDTL ba netik ho simbolu nasaun nian Ida ne’e mak importante”dehan nia.
Diretor Nasional Empregu Estranjeiru, Joao Correia Pereira, esplika, traballador timor-oan sira ne’ebe sei ba servisu iha Australia hamutuk 135.
“Iha 135 pessoas ne’e iha empregador 8 mak halo rekrutamentu ba ita nia maluk sira ne’ebe mak servisu, iha sira ne’ebe tuan hamutuk 73 sira ne’ebe mak foun 62″dehan nia.
Joao haktuir, kona-ba traballadór tuan laos SEFOPE mak bolu maibé empregadór haree ba sira nia servisu badinas no hahalok di’ak nune’e kontinua bolu sira ba servisu.
“Ba sira tuan 73 informa ita hotu iha ne’e sira ne’e laos hakarak ba mai-ba mai maibé sira ne’e ita bele dehan traballadór sira ne’ebé ho jovens sira ne’ebé servisu badinas hahalok di’ak eh atitude di’ak”dehan nia.
Traballador Timor-oan Abrao da Costa agradese ba SEFOPE tanba kontinua fasilita traballadór timor-oan ba sira ba servisu iha nasaun Australia.
“Liu husi Sekretaria Estadu Formasaun Profisional No Empregu fasilita traballador timor-oan ne’ebe ba servisu iha Australia hodi halo saida, hodi halo hasae kresimentu ekonomia familia uma laran nian,” Abrao hatete.
Traballador timoroan ne’e mós promete sei kontinua hatudu komportamentu di’ak nune’e empregadór sira kontinua rekruta timoroan sira iha futuru oin mai.
“Ami sei hatudu nafatin komportamentu ne’ebe di’ak ho dedikasaun ne’ebé di’ak hodi hamorin nafatin nasaun Timor-Leste nia naran”dehan nia.
Enkuantu husi traballador 173 ne’e empregadór 8 mak rekruta sira sei ba servisu iha kompaña Down to Earth, Ceres Farm, Tasmania Beries, Pinata Farm, Job Australia, Queensland Berries, Queensland Berries, Queensland Berries, no sei aranka iha loron 06 to’o loron 20 fulan fevereiru tinan ne’e.
Jornalista : Alberto Pires
Editor : Herminio Cardoso