Loluwari Média (Bobonaro) – Partidu Libertasaun Popular (PLP) sei halo fali re-ajustamentu estrutura polítika iha nivél suku sira iha postu Administrativu Atabae Munisípiu Bobonaru.
Vise Komisáriu Polítika Nasionál CPN 5, Carciliano Oliveira hatete, planu PLP nian sei halo rekrutamentu ba estrutura iha baze hodi priense formulario iha aldeia, suku no postu sira.
“Tanba ne’e mak PLP nia fokus ba iha fulan ida ne’e to’o iha dezembru ita hakarak halo re-ajustamentu ba estrutura iha baze,” Dehan Vise CPN 5 Carciliano Olveira ba jornalista Loluwari.tl iha Aidabaleten domingu (26/04).
Tanba tuir planu PLP nian sei rekruta estrutura sira iha baze aldeia, suku no postu no mós Munisípiu para atu bele reforsa partidu nian,tanba mínimu iha aldeia ne’e 53 estrutura membru depois mai estrutura postu no suku 20.
Nia haktuir,PLP nia ezistensia iha kada Munisípiu to’o iha baze militante barak maibé seidauk iha estrutura rasik hodi halo servisu tuir Partidu nian.
“Estrutura seidauk kompletu estrutura anteriór iha maibé tanba horibainrua reforma ita nia estrutura ne’e, tanba ita presiza aumenta tan númeru tanba ne’e mak hakarak fokus aumenta estrutura aldeia, suku, no postu”dehan nia.
Nia informa,postu Atabae ne’e hanesan baze polítika partidu seluk iha tanba PLP votus minimu teb-tebes 280 resin de’it maibé espera ba oin sei aumenta tanba PLP iha ona rekursu national hodi halo servisu iha baze.
Kooderndor PLP Postu Atabae Justino Leitão reforsa,PLP nia ezistensia iha 2017 to’o iha 2023 ho votus minimu tebes iha postu Administrativu Atabae.
“Tanba ne’e mak ohin vise CPN nasional mai iha postu ne’e atu fó hanoin hodi halo rekrutamentu no re-ajustamentu estrutura iha postu, suku to’o aldeia” dehan nia.
Tanba ne’e sira sei moboliza militante sira no estrutura sira ne’ebe ativu sei servisu makaas atu nune’e iha 2027 to’o 2028 hodi fo vitoria ba PLP iha postu Atabae.
Jornalista : Alberto Pires
Editor : Herminio Cardoso