Loluwari Média (Díli) – Ministru Juventude, Desportu, Arte no Kultura (MJDAC)Timor-Leste, Nelio Isaac hatete kultura hanesan ligasaun ida ne’ebé halibur etadu-membru sira Komunidade Paízes Lian Portugés (CPLP), iha enkontru ne’ebé realiza hodi reforsa koperasaun, diálogu polítiku no implementasaun planu kulturál ba períodu 2026–2028.
Ministru Nelio Isaac afirma kultura, maske la haree matan, iha forsa bo’ot atu hametin relasaun entre nasaun sira CPLP hodi halo sira sai hanesan família luzófonu ida.
“Kultura hanesan fiu invizível ida ne’ebé, maski iha distánsia jeográfika, bele halibur ita hotu hanesan família luzófonu ida,” dehan Nelio Isaac Sarmento, ba jornalista sira iha Hotel Timor, Colmera Díli tersa (05/05).
Nia hatete katak susesu hosi kooperasaun ne’e depende ba kapasidade atu mantén diálogu no vontade atu servisu hamutuk
“Ami nia susesu sei depende ba ami nia kapasidade ba diálogu no vontade ba koperasaun mútua,” Nelio dehan.
Nia mos subliña katak kultura reprezenta baze importante ida ba reziliénsia ekonómika no sosiál hosi nasaun sira membru tanba enkontru ne’e sei ajuda atu avalia implementasaun planu asaun anteriór no determina prioridade foun ba períodu 2026–2028.
Entre área prioritária sira mak dezenvolvimentu rekursu umanu, dijitalizasaun arte no kultura, no proteksaun patrimóniu kulturál. Governu mos konsidera importante atu fortalese indústria kulturál no kriativa hodi kontribui ba kresimentu ekonómiku no kriasaun empregu.
Diretór Jerál CPLP, Miguel Monteiro, hatete kultura tenke sai eixu sentrál iha polítika públika sira, laos hanesan setór perifériku.
“Kultura labele hare’e hanesan setór perifériku ida, maibé tenke sai domíniu estratéjiku ida iha kontestu globál,” dehan Miguel Monteiro.
Nia mos destaka importánsia diplomasia kulturál nu’udar instrumentu atu hakbesik povu sira no hametin konfiansa entre nasaun sira. Tanba ne’e, nia defende reforsu mobilidade kulturál, inklui fasilita sirkulasaun artista, investigadór no profisionál sira iha área ne’e.
Enkontru ne’e mos foka ba transformasaun dijitál, liu husi kriasaun plataforma atu promove konteúdu kulturál no dijitalizasaun patrimóniu. Lideransa CPLP espera katak reuniaun ne’e sei produz desizaun konkreta hodi reforsa koperasaun kulturál ho impaktu diretu ba sidadaun sira.
Jornalista Estajiario : Arcângela dos Santos Pereira
Editor : Hermínio Cardoso