Loluwari Média (Lautém) – Komunidade Suku Pairara sente triste ho feira ne’ebe loke iha ámbitu selebradaun Tinan 24 Restaurasaun Independénsia tanba produtu lokál no hahan sira ne’ebé sira fa’an la folin tanba vizitante sira ladun iha atu hola.
Komunidade sira sente triste tanba kada Stand sira selu $10 dolar maibé produtu lokál no hahan sira la folin no kada loron hetan de’it $5 dolar no $20 dolar tanba feira ne’e hahú loron primeiru de’it maibé derepente para iha dalan klaran.
.”Hau sente triste tanba ami selu ba Stand 10 dolar, no ami fa’an hahan lokal sira ne’e maibe ema la ladun barak dala ruma loron ida hetan deit 5 dolar tanba ema la iha atu hola,” Dehan Adolfina Vieira ba jornalista loluwari.tl iha suku Pairara tersa, (20/05).
Adolfina esplika, hahan sira ne’ebe ami halo hodi fa’an ne’e mak hanesan, aifarina, bola salju, fore rai, fore mungu, manu tolun, pop ice, es no nasi bungkus.
“Hau nia kolega sira seluk hau lahatene maibe ba hau kada loron mak hetan deit mak 5 dolar,” Nia dehan.
Olandina de Araujo Ramos fa’an produtu lokál iha feira ne’e sente triste tanba feira ne’e hanesan mai habosok fali komunidade tanba loron primeiru de’it rame maibé loron tuir mai fatin hotu-hotu mamuk.
“Semana uluk ne’e pameran iha ne’e ema mai barak mais ladun mais derepente para tiha fatin sira ne’e mamuk tiha ne’e halo ami triste, ami mós lahatene kona-ba ida ne’e tanba saida mak para?” dehan nia.
Hahan sira ne’ebe mak fa’an mak hanesan, doce, permen, manu tolun da’an, pop mie, aqua, kafé, good day no white koffe.
“Ami sente kontente tanba kalan ida ami hetan 20 dolar maibe sente triste mos wainhira kolega sira seluk dala ruma hetan deit 5 dolar, Dehan Nia.
Xefe seksaun Izino esplika,kona-ba feira ne’e laos komisaun mak hapara maibé kauza husi jogus balun ne’ebé mak balun loke nune’e halo triste komunidade sira seluk ne’ebe loke feira ne’e.
“Ami nia planu feira ne’e ami abertura iha dia 5 maiu no ami sei ensera iha dia 20 ohin ne’ebé komu ami para iha dalan klaran laos tanba ami mak haruka para maibé ida ne’e tanba kauza husi jogus balun ne’ebé ita nia governu rasik hatete hodi para”dehan nia.
Tanba ne’e komunidade ne’ebé loke feira ne’e sira laiha ona vontade bainhira para jogus sira ne’e entaun sira labele loke tanba hodi ida ne’e mak komunidade sira senti triste.
“Kuaze maioria ami nia komunidade liu-liu ba sira ne’ebé loke hela stand sira ne’e ba produtu lokál sira ne’e sira sente triste tanba feira ne’e para iha dalan klaran”
Nia informa, feira kuaze la’o loron 7 nia laran, iha loron 7 ne’e feira iha tipu oi-oin iha produtu lokal, iha produsaun sabaun husi grupu afihini ho tan produtu lokál sira seluk.
Nia dehan, kada stand komunidade sira selu 10 dolar no hetan apoiu mós husi funsionariu públiku, veteranos no komunidade sira hotu nia kontribuisaun hodi atende ba aktividadade komisaun organizadora feira ninian.
Jornalista : Alberto Pires
Editor : Herminio Cardoso