Loluwari Média (Díli) – Uniaun Estudante Universitáriu Munisípiu Viqueque (UEUMV) kestiona dezenvolvimentu iha munisípiu Viqueque ne’ebé laiha mudansa signifikativu ba povu nia moris.
Tuir portavóz UEUMV António Gomes, IX governu ukun tinan 3 maibé povu Munisípiu Viqueque kontinua hela ho dezenvolvimentu ida ne’ebé laiha benefísiu ba povu nia moris.
“Setór produtivu sira ne’ebé fó benefísiu direita ba povu nia moris hanesan edukasaun, saúde, agrikultura, turizmu, bee-moos, eletrisidade, no rede internet estadu kontinua ignora no la tau nu’udar prioridade”dehan nia ba jornalista sira iha jardin 5 de Maio (22/05).
UEUMV mós krítika tranzitóriu governasaun nian ne’ebé laiha estratejia polítika klaru ba alokasaun Orsamentu Jerál Estadu (OJE), no kestiona hakat foun husi kada governu foun ne’ebé sempre troka fali programa.
Maske nune’e, Nia informa, Viqueque riku ho rekursu naturál no poténsia boot ba turizmu no agrikultura hanesan nu’u, natar, no mina-rai iha Ailembata.
Tanba Kondisaun estrada diresaun husi Ossu ba Viqueque Vila, Lakluta, Uatolari, no Uatocarbau grave tebes, Kondisaun aat ne’e fó prejuízu boot ba movimentu populasaun, kria difikuldade ba transporte públiku, no mós hapara komunidade atu lori produtu lokál ba merkadu, labarik sira atu ba eskola, no asesu ba ospitál.
Husi preokupasaun ne’e, UEUMV hato’o ezijénsia no rekomendasaun ba autoridade relevante sira hanesan; Prezidente Autoridade Munisípiu (PAM) Viqueque Atu asume ninia responsabilidade polítika internál.
Tenke kria planu konkretu no proposta hodi aprezenta ba Ministériu Obras Públikas (MOP) no Konsellu Ministru hodi responde lalais ba estrada iha kapitál munisípiu no área rurál sira.
Alende ne’e, Husu ba IX Governu Konstitusionál atu la bele mai de’it ho promesa mamuk ba povu Viqueque, maibé tenke foti fali asaun hodi harii estrada no ponte sira.
Nune’e mós ba Parlamentu Nasionál tenke Atu hala’o funsaun fiskalizasaun ho loloos, diskute interese povu nian, no labele transforma uma-fukun sai fali ba fatin konfrontasaun interese partidu nian.
Apolinário da Silva, reforsa, bainhira governu la responde sira-nia ezijénsia, di’ak liu povu Viqueque la lakon tan oportunidade iha tinan lima oin mai hodi fó votu.
“Tuir ami-nia hanoin nu’udar Timor-oan, ezije nafatin. Se enkuantu sira la halo, di’ak liu Viqueque-oan la lalika vota. Vota mós hanesan de’it”dehan nia.
Se inan-aman, Nia dehan,iha Viqueque rona estudante nia lian, bainhira tempu vota, tinan lima povu sei lakon tan oportunidade ba dezenvolvimentu.
“Bainhira Xanana ba iha ne’ebá sira ateru tiha dalan, maibé liu tiha ida-ne’e sira husik de’it. Nune’e mak ami estudante la satisfáz no ami ezije duni” dehan nia.
Bainhira laiha solusaun mak estudante sira sei halo diálogu ho parte relevante sira ne’ebé mak asumi kargu PAM, Karik laiha solusaun, sei ba Ministériu Obras Públikas hodi hadia lalais estrada no ponte.
Jornalista Estajiáriu : Quintão dos Santos
Editor : Herminio Cardoso