Loluwari Média (Díli) – Liga Futebol Timor-Leste (LFTL) implementa hikas fa’an tiket ba adeptus sira bainhira atu asesu jogu iha stádiu Munisipál Dili ho presu kada ema ida hahú 0.50 to’o $2.00.
Sekretáriu Jerál LFTL Osório Florindo hatete,LFTL deside ona atu hahú fa’an fali tiket ba adeptu sira ne’ebé hakarak assiste jodu.
“Ohin ita hahú fa’an fila-fali tanba pelumemus ita tenke iha kondisaun mínimu ema mai assiste bele tuur iha kadeira ka iha mahon ruma, Tanba ne’e mak ita fa’an tiket ba époka ida-ne’e, no osan sira-ne’e la’os ba sé-sé, maibé ba fali klube sira” dehan Osório Forindo ba jornalista sira.
Desizaun ne’e foti hodi responde ba preokupasaun finansiamentu klube sira-nian no kobre kusta operasionál ne’ebé labele kobre ho orsamentu fiksadu.
Nia informa,katak osan ne’ebé koleta husi fa’an tiket ne’e sei la ba interese pesoál, maibé sei entrega fali ba klube sira no mós ba kusta organizasaun Liga nian.
“Ita Timor tenta atu la’o, ne’e la’ós ba dala primeiru ita fa’an tiket, tanba tinan hira liubá mós Liga halo ona ida-ne’e maibé ita hapara tiha”dehan nia.
Presu Tiket no Mekanizmu Fahe Rendimentu,Ba kadeira sira iha tribun boot ne’ebé iha mahon hodi udan labele kona ka loron labele kona, LFTL fiksa presu $2.00.
Presu ne’e kobre kedas ba jogu rua (2) ne’ebé hala’o iha loron ida, hanesan jogu primeiru iha tuku 16:00 no jogu segundu iha tuku 19:00 OTL. Se jogu ida de’it mak hala’o, presu tiket sei tuun ba $1.00.
Enkuantu ba tribun parte loos (tribun timur) ne’ebé seidauk iha kondisaun mahon, LFTL planeia atu fa’an de’it ho presu $0.50 ba kada ema.
Kona-ba mekanizmu fahe rendimentu husi rezultadu fa’an tiket nian, LFTL foti tha desizaun hanesan tuir mai:
30 pursentu sei fahe ba kada klube sira ne’ebé joga lor-loron, 40 pursentu sei fahe ba Liga (LFTL).
Rendimentu 40% ne’ebé ba Liga ne’e sei uza hodi selu kusta enerjia elétrika naroman estádiu nian tanba jogu hala’o iha tempu kalan, inklui mós hodi selu pesoál hamutuk na’in 18 ne’ebé halo serbisu adisionál maibé la tama iha planu orsamentu inisiál LFTL nian.
Kusta extra ne’e mosu tanba mudansa ba fatin hala’o kampionatu nian. Iha inísiu, LFTL planeia atu organiza jogu sira iha foho (munisípiu), maibé depois de koordena ho Federasaun Futeból Timor-Leste (FFTL), deside fali hodi joga iha Dili.
Maski FFTL fó apoiu hodi fasilita pesoál seguransa no kliner ne’ebé kontratadu ona, LFTL rasik seidauk iha alokasaun orsamentu ba despeza adisionál seluk iha Dili, nune’e fa’an tiket sai hanesan solusaun lójiku hodi rezolve kestaun sira-ne’e.
Transforma Futeból ba Indústria no Merkadu
Alende ne’e,LFTL rekoñese katak desizaun ne’e sei simu krítika husi parte balu tanba timoroan sira toman ona assiste jogu futeból gratuitu durante tinan 10 resin nia laran.
Maski nune’e, nia subliña katak kampionatu iha mundu tomak sempre aplika sistema tiket nian.
“Ita hahú eduka katak klube futeból ne’e karun se ita ko’alia loloos de’it. Futeból loloos ne’e indústria no ko’alia kona-ba merkadu, maibé ita hahú husi buat ki’ik sira-ne’e lai,” nia haktuir.
Nia hatutan, parte balu husi na’in ba klube futeból sira iha Timor-Leste la’ós emprezáriu riku, maibé kuaze pursentu 90 hili harii klube tanba de’it domin no interese ba futeból.
Klube sira-ne’e dependente tebes ba subsídiu husi governu ka federasaun ne’ebé montante mós limitadu tebes ba époka ida-ne’e.
Jornalista Estajiariu : Quintão dos Santos Tilman
Editór : Herminio Cardoso