Loluwari Média (Díli) – Semana oin iha Loron 12 madrugada kalan fahe rua iha tuku 4:00 oras TL povu Timor-Leste bele asiste abertura Copa Mundiál FiFa Word Cup husi Nasaun Méksiko vs Korea Selatan iha kanál Radio Televizaun Timor-Leste Empreza Públiku no plataforma dijitál ETO-Telko.
Prezidente FFTL Nilton Gusmão, konsidera inisiativa ne’e nu’udar oportunidade importante atu povu Timor-Leste bele sai parte husi espetákulu mundial ne’ebé atrai atensaun ema iha mundu tomak kada tinan ha’at inklui TL.
“Ema hotu-hotu hakarak akompaña no haree kampiaun mundial foun, Timor-Leste mos iha priviléjiu atu bele asesu ba eventu ida ne’e liuhusi RTTL, atu sosiedade no komunidade hotu bele haree gratuitamente,” dehan Prezidente Federasaun Futebol Timor-Leste (FFTL), Nilton Gusmão, ba jornalista sira iha konferénsia imprensa iha Hotel Timor, Díli, Sexta-feira (05/06).
Nia dehan,transmisaun Copa Mundial 2026 ne’e hetan liu-husi prosesu ofisiál ho Federasaun Internasionál Futebol Asosiasaun (FIFA) no ETO Telko, nu’udar direitu transmisaun, partilla direitu refere ho RTTL atu garante povu Timor-Leste bele asesu ba kompetisaun mundial ne’e.
“Tanba ida ne’e, ha’u agradese tebes ba Sekretáriu Estadu Komunikasaun Sosial, Señor Expedito Dias Ximenes, ne’ebé buka aproximasaun bebeik ho ETO Telko atu realiza parseria ida ne’e no lori espetákulu mundial ida ne’e ba ema hotu iha ida-idak nia uma”dehan nia.
Nia hatutan, futebol sai desportu ne’ebé hetan paixaun boot husi Timor oan sira, maske dezenvolvimentu modalidade ne’e iha país seidauk lao lalais hanesan esperadu.
Tanba ne’e FFTL konvida Timor oan hotu atu asiste espetákulu mundiál ida ne’e ho espiritu desportivu. Kada ida-idak bele apoia nasaun ka ekipa ne’ebé nia suporta, maibé manan ka lakon ne’e normál.
“Ha’u fiar katak Copa Mundial 2026 sei lori euforia foun ida ba ita nia sosiedade. Foinsa’e sira, jogadór sira no árbitru sira bele aprende buat barak husi kompetisaun ida ne’e, liu-liu kona-ba regra foun sira ne’ebé sei implementa durante torneiu,” dehan nia.
Iha fatin hanesan, Sekretáriu Estadu Komunikasaun Sosial (SECOMS) Expedito Dias Ximenes, hatete, Governu halo parseria ida ne’e ho Eto-Telco atu garante povu Timor-Leste bele asesu ba transmisaun direta Copa Mundial ho kualidade di’ak.
“Governu nia apoiu primeiru mak loke kanal RTTL atu povu hotu bele akompaña. Segundu, tanba prosesu atu hetan direitu transmisaun ida ne’e naruk no presiza kustu boot”dehan nia.
Tanba ne’e Governu mos fó apoiu iha servisu hamutuk ho ETO Telko atu garante transmisaun ne’e lao ho di’ak no kualidade aas tanba RTTL ho Eto-Telco sempre apoiu malu iha jogu Copa Mundiál.
Tanba ne’e Governu mós sei planeia prepara fatin estratéjiku balun iha Díli no munisípiu sira atu komunidade bele haree hamutuk partisipa no hametin relasaun entre joven sira.
“Ita mos hanoin atu prepara fatin estratéjiku balun iha Díli no munisípiu sira atu povu bele haree hamutuk, Ida ne’e atu hametin amizade no fraternidade entre joven sira no mós atu sira bele aprende liu-liu ba sira ne’ebé iha talentu iha área futebol”dehan nia.
Enkuantu Governu aloka orsamentu hamutuk Rihun $200.000 atu apoia parseria entre RTTL.EP ho Eto-Telco ba transmisaun Copa Mundial FIFA 2026, hodi garante povu TL bele asesu ba eventu desportivu mundial ne’e.
Entretantu Copa Mundial FIFA 2026 sei realiza iha nasaun Estados Unidos, Canadá no México hahú husi loron 11 to’o remata iha iha loron 28 fulan juñu Tinan 2026.
Jornalista Estajiária : Arcângela dos Santos Pereira/Monna Ivonia Gracia Almeida
Editór : Herminio Cardoso