Loluwari Média (Díli) – Ministru Transporte Komunikasaun (MTK) Miguel Marques Gonçalves Manitelu lansa ofisialmente plataforma dijitál website foun ho naran Verify.gov.tl atu fasilita prosesu verifikasaun no garante autentisidade karta kondusaun falsu iha Timor-Leste
Ministru hatete,plataforma ne’e dezenvolve tuir memorandu entendimentu ne’ebé Governu TL asina ho parseiru sira iha Kamboja iha loron 20 Janeiru 2025.
Tanba Depois de asina akordu ekipa tekniku hahú halo avaliasaun ba Diresaun Nasionál Transporte Terestre (DNTT) iha Marsu 2025 atu prepara implementasaun sistema ne’e.
“Ekipa tekniku sira hahú servisu iha Marsu 2025 no konklui iha Novembru,maske nune’e, ami seidauk konsege lansa sistema ne’e to’o ohin,Agora ami iha oportunidade atu lansa ofisialmente plataforma Verify.gov.tl,” dehan Miguel Marques Gonçalves Manetelu ba jornalista sira iha salaun multiozu GMN Bebora Díli, segunda(01/06).
Nia dehan,etapa dahuluk implementasaun sistema ne’e aplika ba karta kondusaun liu-husi utilizasaun QR Code atu aumenta seguransa no prevene falsifikasaun dokumentu.
Nia hatutan, ema ne’ebé kaer karta kondusaun ho QR Code bele verifica informasaun proprietáriu dokumentu liu-husi telemóvel ho forma ida ne’e, autoridade ka públiku bele konfirma se dokumentu ne’e loos duni no pertense ba nain legítimu ka lae.
“Tanba dala-ruma dokumentu bele falsifika. Maibé ho QR Code ne’e, ema bele uza telemóvel atu haree informasaun ne’ebé konfirmasaun katak dokumentu ne’e orijinál no pertense ba nain duni,” hatete nia.
Nia informa, atualmente balu husi karta kondusaun foun sira ona utiliza QR Code, no ba oin DNTT sei kontinua distribui ba públiku Karta kondusaun antigu sira ne’ebé seidauk iha QR Code sei troka gradualmente.
Tanba sistema ne’e importante atu responde dezafiu era dijitál, inklui risku manipulasaun imajen no informasaun liu-husi intelijénsia artifisiál.
Tanba ne’e, verifikasaun liu-husi plataforma dijitál sai mekanizmu importante atu garante identidade no autentisidade dokumentu.
“Plataforma ida ne’e atu asegura katak ema ne’ebé kaer dokumentu ne’e mak nain duni ba dokumentu refere,” dehan nia.
Aleinde karta kondusaun, Governu planeia atu estende utilizasaun plataforma Verify.gov.tl ba dokumentu ofisiál seluk sira iha futuru.
Nia hatutan, inisiativa ne’e forma ida husi esforsu Governu atu promove digitalizasaun servisu públiku no arkivamentu eletróniku.
“Agora ita tama ona iha era digitalizasaun. Ita la bele depende de’it ba sistema manuál,dokumentu hotu tenke digitaliza atu asegura arkivu no informasaun governamentál sira permanese seguru no fasil atu asesu,”dehan nia.
Jornalista Estajiária : Arcângela dos Santos Pereira/Dulce Magalhães
Editór : Herminio Cardoso