Loluwari Média (Díli) – Nonu governu kontinua suspende atividade arte marsiál iha Timor-Leste to’o fulan Dezembru Tinan ne’e hodi evita mós jovens sira labele provoka iha Eleisaun Prezidensiál 2027.
Asuntu ne’e,Primeiru-Ministru Kay Rala Xanana Gusmão informa ba Prezidente Repúblika José Ramos-Horta tanba Governu deside prolonga suspensaun ba treinu no prátika arte marsiál to’o loron 31 Dezembru 2026.
“Tanba ita haree katak 2027 sei iha eleisaun prezidensiál iha fatin balun, tanba ne’e maka Governu deside atu prolonga suspensaun treinu prátika to’o 31 Dezembru hodi labele provoka,” Dehan Primeiro Ministru (PM)Kay Rala Xanana Gusmao, ba Jornalista sira iha Palasio prejidensial Nicolau Lobato Dili, Sexta (5/06)
PM Xanana fó ezemplu,iha selebrasaun 20 de Maiu tinan ne’e no vizita artista Indonézia Iwan Fals nian mai Dili la akontese insidente ruma halo situasaun hakmatek.
“Prezidente apresia. Sente katak povu joven sira la’o ba mai la akontese buat ida”dehan nia.
Iha Kuarta-Feira ne’e,Konsellu Ministrus hala’o sorumutu iha Palásiu Governu, Dili, no aprova ona projetu Rezolusaun Governu nian, ne’ebé hanaruk, to’o loron 31 fulan-dezembru tinan 2026,.
Períodu vijénsia suspensaun ba ensinu, aprendizajen no prátika arte marsiál, no mós enserramentu temporáriu ba fatin no instalasaun hothotu ne’ebé utiliza ba ensinu, aprendizajen no prátika arte marsiál.
Desizaun ne’e kontinua Rezolusaun Governu n. 45/2023, loron 10 fulan-novembru, ne’ebé prolonga ona tuituir malu liu-husi Rezolusaun n. 17/2024, loron 24 fulan-abril, n. 60/2024, loron 7 fulan-novembru, n. 22/2025, loron 7 fulan-abril no n. 77/2025, loron 17 fulan-dezembru.
Presupostu sira ne’ebé justifika suspensaun ne’e vigora nafatin, liu-liu nesesidade atu hametin dame sosiál ne’ebé hetan ona dezde fulan-novembru 2023 no atu garante katak prátika arte marsiál sei bele halo de’it iha kontestu desportivu, hodi kontribui ba formasaun sívika no umanista ba joven sira.
Iha loron 30 fulan-jullu tinan 2025, Governu Konstitusionál IX aprova proposta lei ida, ne’ebé submete ona ba Parlamentu Nasionál, ne’ebé ho objetivu atu regula rejime jurídiku foun ba prátika arte marsiál. To’o nia aprovasaun no tama iha vigór, kontinua nafatin suspensaun no enserramentu temporáriu ba fatin sira ne’ebé utiliza ba ensinu, aprendizajen no prátika arte marsiál
Jornalista Estajiária : Ivonia dos santos/Graciela Rei-Leve da Silva
Editór : Herminio Cardoso