Loluwari Média (Aileu) – Prezidente Repúblika (PR), José Ramos-Horta, fahe nesesidade báziku ba família 200, iha aldeia Talitu, postu administrativu Laulara, munisípiu Aileu, nu’udar prezente Natál ba povu. Distribuisaun ne’e hala’o hamutuk ho reprezentante Vise-Primeiru-Ministru, Virgilio Smith no Asesór Prezidensiál.
“Apoiu ne’ebé ita distribui mak foos, mina, manu-tolun, no kamizola natal ba komunidade, nu’udar parte ida husi programa Natal do Povo ne’ebé inisia husi Prezidente Repúblika ho apoiu husi Primeiru-Ministru liuhusi Vise Primeiru-Ministru, Francisco Kalbuadi Lay.” Dehan Prezidente Repúblika (PR), José Ramos-Horta, ba jornalista sira, hafoin distribui sasan ba komunidade 200 iha Laulara Aileu, sabadu (21/12).
Xefe Estadu hatete, iha natal no tinan foun fahe hahan báziku ba komunidade sira ne’ebé vulnerável nomos ema ho defisiente sira.
“Ita nia distribuisaun ne’e bazeia ba pedidu husi autoridade lokál sira no halo parte iha programa asisténsia Prezidente nian ba ema ne’ebé presiza, ne’ebé benefisia ona ema millaun 5 resin dezde inísiu mandatu.”
Xefe aldeia Talitu, Abril Barreto, agradese ba Prezidénsia Repúblika no Vise-Primeiru-Ministru ba inisiativa ne’ebé foka liliu ba ema vulneravel no sira ne’ebé ho defisiénsia.
“Ami agradese tebes ba Na’i Prezidente Repúblika nia apoiu nesesidade báziku mai iha ami nia komunidade sira ne’ebé moris ho vulnerável, inklui ema ho difesensia sira.”
Jornalista : Chay Risky