Loluwari Média (Covalima) – Prezidente Repúblika (PR), José Ramos-Horta, vizita uma mahon sentru esperansa ba feto hodi apoiu nesésidade báziku mak foos, supermie no mina ba orfonatu sira iha suku Maudemo, postu administrativu Tilomar, munisípiu Covalima.
“Obrigadu simu ami iha ne’e, ohin dader ba fatin barak, lori tulun báziku uitoan ba ita nia ema ho defisiensia no mos ba ita nia ema ho vulneravel ho tulun ne’ebé mai husi Prezidensia Repúblika, ne’e mak husi estadu, ha’u halo de’it ha’u nia obrigasaun, halo de’it ha’u nia konsiénsia, ita buka ajuda ba labarik sira ne’ebé hetan violénsia, ka labarik sira ne’ebé moris iha difikuldade susar teb-tebes iha Timor-Leste.” dehan PR, José Ramos-Horta, ba jornalista sira bainhira vizita uma mahon sentru esperansa ba feto fo apoiu nesésidade báziku, iha suku Maudemo, postu administrativu Tilomar, munisípiu Covalima, Kinta (27/03).
PR esplika, apoiu ne’ebé entrega, ne’e mai husi estadu, governu, parlamentu. Governu maun Xanana nia apoiu 100% atividade ne’ebé PR hamutuk buka hamenus tiha inan-aman, avo sira nia susar.
“Maibé komunidade balu internasionál hanesan Japaun, Korea du Súl, iha mós ema barak iha Austrália kuñese, ha’u husu ba sira, sira sei kontinua nafatin apoiu programa sira.”
Diretóra Sentru Esperansa ba Feto, Santina Imaculada de Oliveira, informa, durante ne’e hetan apoiu máximu husi governu Timor-Leste, liliu Prezidente Repúblika nia prezensa apoiu no tulun nafatin. Maske atividade barak ne’ebé la marka direita, maibé apoiu no suporta ne’e nafatin.
“Ami hotu agradese tanba ami nafatin hetan apoiu no suporta. Ami agradese tebes, tanba liliu ba oan sira ne’ebé hela iha fatin ida ne’e, durante ne’e ami haree de’it, liuhusi televizaun, dala barak labarik sira dehan bainhira mak ita bele hasoru Prezidente Repúblika direita, entaun ami labele realiza sira nia mehi, tanba sira barak mak mai husi área rurál no labele asesu televizaun. Entaun ohin loron sira bele haree no hasoru direita PR ho ekipa iha fatin ida ne’e.”
Agradese ba governu Timor-Leste ne’ebé suporta kongregasaun, liuhusi Fundadaun Sentru Esperansa Feto, durante tinan rihun rua neen to’o mai momentu ida ne’e, kongregasaun hari’i organizasaun tinan 2006 to’o mai momentu ida ne’e, la la’o mesak, la servisu mesak, la sente mesak, tanba governu Timor-Leste nia apoiu ne’ebé máximu tebes ba uma mahon ida ne’e, inklui oferese rai ida ne’e ba kongregasaun hodi hala’o atividade ida ne’ebé apoiu feto no labarik feto ne’ebé hetan violénsia iha territóriu Timor laran tomak.
“Atu hatete de’it katak alin sira ne’ebé marka prezensa iha fatin ida ne’e, agora daudaun mai husi munisípiu 10, sira mai ho sira nia tipu kazu ne’ebé oi-oin no sira nia problema sosiál oi-oin. Mai ho violénsia domestika, abuzu seksual ba minoridade, violénsia seksual ba insestu, no mós ba abandonadu sira ne’ebé iha.”
Maibé, la servisu mesak, no alin sira ne’e lá’os direita mai mesak maibé mai husi parseiru servisu sira, liuhusi Ministériu Solidaridade Sosiál no Inkluzaun (MSSI) nia tékniku sira ne’ebé iha munisípiu, hamutuk ho ALFELA, FOKUPERS, PRADET, no mós sosiédade sivil sira ne’ebé nia vizaun no misaun hanesan kongregasaun SSPS hakarak atu proteze no asegura feto no labarik ne’ebé hasoru violénsia iha sira nia moris.
Ho prezensa ida ne’e halo uma mahon sai forsa liu tan, sai brani atu hakat nafatin hodi luta hasoru violénsia bazeia ba jéneru iha Timor-Leste.
“Uma mahon ida ne’e kongregasaun hari’i nu’udar SSPS, maibé ami nia objetivu no ami nia misaun atu proteze feto no labarik, ami la haree ba fronteira, ami la haree ba relijiaun, ami la haree ba mai husi nasaun ne’ebé, maibé husi relijiaun hotu-hotu ami la haree, ami haree umanu.”
Uma Mahon Sentru Esperansa ba Feto iha Salele, hetan mós apoiu orsamentu husi Prezidensia Repúblika ho totál $1.000.00.
Jornalista : Chay Risky