Loluwari Média (Díli) – Prezidente Ezekutivu Fundasaun Cristal (ICT), Agostinho dos Santos Gonçalves, hatete, Fundasaun Cristal hala’o Retiru hodi prepara an atu simu grasa no rekonsiliasaun iha tempu paskua.
“Iha tempu barak ita ida-idak buka servisu ita hadook an husi Maromak maibé iha tempu paskua mai ita ida-idak rekonsilia ita nia an ba Maromak, tanba Maromak mak fo tulun no grasa mai ita.” Dehan Prezidente Ezekutivu Fundasaun Institutu Cristal (ICT), Agostinho dos Santos Gonçalves, ba jornalista sira, hafoin retiru iha Institutu Superiór Cristal Balide, Sabadu (05/04).
Nia hatete, Jubileu nu’udar tempu ba grasa no rekonsiliasaun ba Maromak hodi ajuda halo diak ba malu. Tanba Amu Papa nia liafuan dehan “Ita nia fiar mak ita nia kultura” tanba ne’e lorloron tenke halo orasaun molok ida-idak hala’o nia kna’ar. Tanba orasaun mak sai nu’udar kultura Timor.
“Dala barak ita okupadu liu ba ita nia moris no ita haluha Maromak tanba ne’e iha tempu paskua mai ita ida-idak prepara ita nia an no ita ida-idak halo rekonsiliasaun iha tempu kuarezma tanba tempu jubileu hanesan sarani oan ne’e tempu grasa nian.”
Retiru ba familia bo’ot Institutu Edukativu Kristal no Fundasaun Cristal hodi preparasaun ba festa Paskua tinan 2025 ho tema Jubileu Peregrinus ba esperansa.
Padre, Justino de Sousa SDB hatete, Familia bo’ot Kristal Retiru ne’e hanesan prepara an molok tama ba tempu kuarezma nian.
“Iha Tempu ida ne’e ita atu harohan, Jejum no halo karidade iha tempu kuarezma ba ida-idak nia moris. Tanba Maromak nafatin horik ho ita, tanba tempu hafoun no tempu rekonsiliasaun atu ita rekonsilia ho Maromak no tempu ita atu harohan.”
Tinan jubileu ne’e selebrasaun ba Maromak sei liberta nia sarani sira iha tendensia nia laran tanba sinjas fo renovasaun ba sarani sira simu ahuk-desan ne’e la’os ritual maibé sinal ba renovasaun no haraik an. Tanba ema mai husi rai sei fila ba rai.
“Ita ida-idak hala’o ita nia moris ohin loron balu katuas ona balu sei joven no mos balu sei ki’ik tempu ida ita sei mate ita nia isin sei fila ba rai maibé ita nia klamar mai husi Maromak sei fila ba Nia ha’u sei fila-fali ba Maromak liuhusi jejum.”
Dala barak formador sira hala’o sira nia kna’ar kontente haluha no la sente katak buat ne’e imi iha ne’e grasa mai husi Maromak tanba ne’e keta lakon imi nia agradesimentu ba Maromak.
“Ha’u fiar katak fatin ida ne’e sai forsa ida atu bele eduka no forma ema atu bele lori rai no familia ba oin tanba ne’e tempu kuarezma hafoun imi nia an iha fuan hodi lori ida-idak nia kruz tanba kruz ne’ebé ita lori sei fo salvasaun ba ita.”
Iha tempu kuarezma atu hadame malu ho Maromak tanba tempu kuarezma fo opurtunidade ba sarani sira atu halo rekonsiliasaun ho Maromak no mos ba ema hotu.
Vise Dekanu Fakuldade Siensia Edukasaun Institutu Superior Cristal, Bonifácio Cardoso Martins, hatete, Fundasaun Institutu Cristal hala’o nia Retiru hodi Preparasaun ba festa paskua tinan akademiku 2025.
“Ami nia retiru ida ne’e envolve husi estudante, hahu husi Ensinu Basico to’o iha nivél programa masteradu no mos ba funsionariu inklui Dirijente Institutu Edukativu Kristal ho Retiru ida ne’e hodi halo preparasaun no halo rekonsiliasaun iha tempu kuarezma.”
Fundasaun Cristal mai ho nia moto “Sai Sarani ne’ebé diak no sai sidadaun ne’ebé onestu” tanba ne’e mak Fundasaun Cristal tenke hanorin sidadaun ne’ebé diak liuhusi Retiru ne’ebé sira hala’o.
Iha 08 Abril familia Edukativu Kristal sei konsentra iha Kristal hodi hala’o peregrinasaun tinan jubileu nian lori ida-idak nian kruz ba to’o iha Katedral hodi manan duluzensia.
Jornalista : Chay Risky