Loluwari Media (Dili) – Prezidente komisaun organizadora Taxa Rotativa Maun Bo’ot Kay Rala Xanana Gusmão, Feliciano Perpeto Ximenes, husu diskulpa ba asosiasaun arbitrajen Timor-Leste, relasiona ho akontesimentu iha kampu kona-ba lideransa pesoal arbitu ne’ebe tu’ir observasaun publiku seidauk iha kunesimentu lidera eventu bo’ot hodi hamosu dezentendimentu.
“Ami laiha problema bo’ot ida, ita nia asosiasaun arbitrajen futeból Timor-Leste laiha problema ida. Iha ne’ebé ita kuandu servisu hamutuk sempre iha dezentendimentu ruma iha ne’ebé de’it la’ós iha futeból de’it ida de’it edifisiu iha servisu funsinariu sira no iha ne’ebé de’it iha mós fatin ne’ebé kuandu servisu konjunta sempre iha ideias kontradis ba malu sempre iha dezentendimentu mais atu problema bo’ot ha’u sente katak laiha i momentu ne’ebá iha duni dezentendimentu maibé la bo’ot ida maibé ha’u sei explika detallu kona-ba dezentendimentu iha momentu ne’ebá.” dehan Presidente KO Taxa Rotativa Avo Nana Cup, Feliciano Perpeto Ximenes, ba jornalista sira, iha Comoro, Assosiaun Xineza, sexta (11/04).
Entretantu Feliciano deklara assuntu ne’e relasiona konferensia imprensa ne’ebé ekipa asosiasaun arbitrajen futeból Timor-Leste (AAFTL) halo.
Alende ne’e hatan ba preokupasaun ida ne’e iha faktus no ko’alia tu’ir realidade nune’e públiku bele hatene no intende ba dezentendimentu ne’ebé akontese iha kampu.
“Agora daudaun ha’u atu responde perguntas horseik ita nia prezidente Assosiaun arbitrajen futeból Timor-Leste, asume kargu rua Prezidente Assosiaun arbitrajen no diretór arbitrajen iha federasaun futeból Timor-Leste ema kargu rua ne’e signifika ema ne’ebé kapasidade bo’ot intelektual ita respeitu, maibé ha’u atu ko’alia tu’ir buat ne’ebé mak akontese, buat ne’ebé mak sira sente no buat sira ne’ebé mak sira haree la bele inventa buat ne’ebé la akontese mós hakerek hotu folla ne’ebá lori le sai hotu ba públiku atu defende sira an maibé buat sira ne’ebé akontese la’ós ba ami komisaun de’it ba adeptus sira ne’ebé iha kampu ne’eba klubu sira ne’ebé partisipa sira hatene muito bem.” nia hakt’ir.
Alende ne’e KO husu diskulpa ba Assosiasaun Arbitrajen Futeból Timor-Leste (AAFTL), nune’e nafatin lori taxa Rotativa Avo Nana ne’e ba oin.
“Ami nunka hapara akordu ho ita bo’ot sira, hapara kontratu ruma ho ita bo’ot sira, maibé ami sempre halo karta husu diskulpa no husu pedidu nafatin ba ita bo’ot sira atu mai apoiu nafatin eventu ida ne’e la’o ho di’ak.” nia informa.
Akontesimentu ne’e mosu tanba falla iha arbitrajen ne’ebé laiha kualidade hodi hamosu problema iha jogu ne’e no la hatun arbitrajen iha liga 1 no liga 2. Maibé hatun arbitrajen ne’ebé seidauk iha nivel atu lidera taxa Rotativa Avo Nana Cup.
Iha 2025 partisipante klubu sira ba Taxa Rotativa Avo Nana Cup ne’e kada klubu rejistu $ 450.00 hafoin partisipa iha iha eventu jogu refere.
“Problema ne’e mosu entre eru husi arbitrajen nia la kualidade hatun fali arbitrajen ne’ebé mak la’ós iha primeira liga no segundu Liga, maibé arbitrajen ne’ebé seidauk iha nivel ne’e atu merese atu lidera jogu taxa Avo Nana. Tanba ita hotu haree jogu ida Avo Nana ema rejistu ho empat ratus lima puluh dólar ($ 450.00).”
Mosu dezentendimentu maibé iha mós solusaun komisaun Organizadora buka arbitrajen na’in 6 ne’e na’in 3 husi estranjeiru Indonesia nian no na’in 3 timor oan rasik hodi lidera eventu taxa Rotativa Avo Nana Cup iha semana oin.
Molok ne’e asosiasaun Arbitrajen deside hapara ona kontratu servisu ho komisaun organizadora tanba ekipa Komisaun organizadora Taxa Avo Nana laiha konsiderasaun ba sira nia servisu, tanba iha konflitu intersee.
“Ami konsidera katak Prezidente KO iha konflitu interese iha kompetisaun sira ne’ebé iha ligasaun ho Klubu FC Laleia ne’ebé iha ligasaun emosional direita ho Prezidente Komisaun Organizadora.”
“AAFTL konsidera laiha separasaun poder husi Prezidente KO taxa Avo Nana. Tanba nu’udar prezidente KO bele halo funsaun hanesan dirijente ba Klubu FC Laleia no ate bele hola papel nu’udar Asistente Referee iha loron 6 Abril 2025.”
“Asosiasaun Arbitragem Futeból Timor-Leste durante ne’e kolaborasaun di’ak ho FFTL no hetan apoiu māximu husi Prezidente Federasaun Futeból Timor-Leste iha atividade no knaar hotu ne’ebé hala’o. Ami iha kompromisiu atu servisu nafatin tu’ir regulamentu no regra síra ne’ebé hatuur ona husi FFTL, hodi nune’e bele kria futeból ida ne’ebé ho kualidade, justu no transparente liu iha Timor-Leste.”
Jornalista : Anis